No.3382/2020-2020

Higher & Technical Education Minister Dr. R. Lalthangliana chuan vawiin khan a pisa ah Mizo Zirlai Pawl leh Mizo Students’ Union hruaitute kawmin College admission chungchanga zirlaiten harsatna an tawh lohna tura hmalak dan tur a sawipui.

Minister Dr. R. Lalthangliana chuan zirlai hruaitute hnenah hian COVID-19 hripui lengin min nghawng dan hi a darhsarh em em a, hriatthiam phak bak leh beisei phak loh thlengin min nghawng avangin hmalak pawh a harsa a ni a ti a. Hmalam hun hriat lawk nilo mahse zirna chhunzawm vat beiseina rilru nen tunlai hian College hrang hrangah admission tih tan a ni a. Hetih lai hian Mizoram pawn atangin hripui vanga zirna chhunzawm theilo zirlai engemawzat an lo haw a, phai lam boruak him chin a hriatloh avangin an zinga tam takin Mizoram chhungah zirna chhunzawm an duh dawn niin a lang a, tun dinhmunah kan college hrang hrangte pawh insangmar a kum dang aia zirlai admit tam tura theih tawp chhuah tura kan ngen chung hian thil buaithlak tak a ni thei dawn a, kar kalta khan Mizoram chhunga sawrkar college principal zawng zawngte kokhawmin College kal duh zirlaite tumah an hnawng lohna tura hmalak dan tur sawiho a ni, a ti.

Minister chuan College kan neihsa ah te zirlai a tam thei ang ber admit dan tur ngaihtuah a ngai a, District hrang hranga College te chu an dinhmun zirchian mek a ni, a ti a. College tinin zirlai an admit theih zat tihpun tumin tan an la vek a, mahse engchen nge an in pawhfan theih ang tih hriat a nilo a, zirlai lak belh hian ken tel a nei ve leh thin bawk nen ngaihtuahna sen nasat a ngai hle a ni, a ti.

Zirlai hruaite pawhin Minister thahnemngaihna a fakawm an tih thu an sawi a, kum dang aia tam zirlai admit belh a tul hian zirtirtu indaihlohna nasa takin a ti zual dawn tih a lang a, hei hi sutkian dan kawng awm se an duh thu an sawi a, Aizawl pawn lam college hrang hranga zirlaiten admission an tih hreh loh a pawimawh thu sawilan niin hemi atan hian theihtawp chhuah tlan a tul an ti a. Zirlaite tana tha tur leh ram leh hnam tana tha tur thilah chuan sawrkar an thlawp tlat zel dawn tih sawiin sawrkar college hmun hrang hrang ami te chu zirlaite hip thei turin tuaihnum lehzual a pawimawha an hriat thu an sawi a ni.

Higher & Technical Education department hotute chuan Mizorama sawrkar college 21 a awm thu tarlangin zirtirtu post ruak 235 a awm mek tih sawiin, zirtirtu thahnemngai ten an hlawh thawh khawmin an indaihlohna phuhru turin zirtirtu an ruai chhawng hial thin a ni, an ti a. Zirlai hruaituten zirtirtu indaihlohna phuhru tura hma lak tul zia an sawi chu Minister hian theihtawp an chhuah reng tih a sawi a ni.