Ni 12 - 13 August 2010 chhung hian MSACS leh UNICEF tangkawpin an buatsaih, Follow - up care for HIV exposed infants training chu Integrated Counseling and testing centre-a Medical Officer leh Counselor te tan Civil Hospital Auditoriumah neih a ni. He training opening session hi Pu Lalrinliana Sailo Health Minister, in a hmanpuia, Dr.P.Sangzuala, Mission Director, NRHM chuan a kaihruai. He opening session-ah hian Pu Lallianzuala, Consultant (UNICEF) chuan thusawiin - Mizoramah nu naupai kumtinin 22,000 - 26,000 vel awma hriat anih thu leh chung zinga HIV hluar dan chu za zel 0.8 anih thu sawiin heti anih chuan naupai 200 chuang chu kumtinin HIV kai an ni dawn tihna a ni a, nute hian enkawlna an dawn that loh chuan naute 100 chuang chuan HIV an kai tur thu leh chung zinga a tam ber chu kum 1 atanga kum 4 chhungin an thih mai tur thu a sawi bawk. Naupai zawng zawng ten HIV Counseling leh testing an dawn a pawimawhzia sawiin, nu nau hrisel nana, naute hnute pek that leh hnute pek chungchang Counseling neih that a pawimawhzia sawiin, heng hi ICTCa naupai an kal reng rengin Counselor ten an lo pek ve thu a sawi bawk.
Khuallian Pu Lalrinliana Sailo chuan thusawiin HIV leh Cancer chu ram tana ngaih pawimawh a tulzia te, Health Department a thawk zawng zawng ten an ngaihpawimawh a tul zia a sawi bawk. Minister chuan nikum chhungin nu naupai 17729 test an ni a, kumin hian 22,000 test tum anih thu sawiin naupai zawng zawngten HIV Counseling leh testing an dawn theih nana tan la turin fuihna thu a sawi nghal bawk. Dr. P. Sangzuala pawhin HIV kai naupai te enkawl leh damdawiin leh a thawktu te target neia, mihring hnathawk te mumal taka in supervise a tulzia leh tan lak a tulzia sawiin, HIV avanga kan Infant mortality rate (IMR) san theih dan leh naupai positive te chhuizui lamah leh enkawl lamah tan lak a ngaihthu a sawi bawk. Hun tawpah hian Dr.Lalbiakkima, Medical Superintendent in lawm thu a sawi. He training ah hian Dr.Rosangluaia, Dr.Lalhmuchhuaka, Dr.Lalchhuankimi leh Dr.Vanlaldiki Ralte ten an zirtir a ni.
