1684/2022-2023
Aizawl, the 23rd August 2022: Vawiin khan Assembly Annex Conference Hall-ah Health Minister Dr. R. Lalthangliana ruahmannain HIV kai awlsam zawk tura ngaih te leh dinhmun hlauhawma ding mek te tana tanpuina(Harm Reduction programs) chak zawk leh nasa zawka kalpui dan tur sawihona leh inrawnkhawmna neih a ni a. He hunah hian HIV/AIDS dona kawnga thawktu line department zawng zawng te, kohhran hruaitute, NGO te leh AIDS vei te enkawlna kawnga thawktute an tel a ni.

Dr. R. Lalthangliana, Health Minister chuan HIV/AIDS chu tanrualna nen hneh theih a ni a ti a. Hripui leng – Covid-19 dona kawnga Zoram mipui zawng zawngte kan tang rual ang khan natna hlauhawm tak min run mek tu – HIV/AIDS hi inlungrual tak leh beidawng duh miah lova kan do tlan chuan chhiatna liantham zawk kan pumpelh thei a ni a ti. Tunah hian kan dinhmun hi a tha lo hle a, India ramah pawh he natna bikah chuan kan dinhmun a tha lo fal hle a. Health Department leh MSACS ang ringawt chuan HIV/AIDS vei pung chho mek zel hi tih ziaawm a theih loh tih a chiang a. Mizoramah he natna tihbaiawm takin tlem lam apan theih loh chhanah mitin ten mawh kan phur tih kan pawm tlan a ngai tawh a ni a ti.

Hripui leng dona kawngah Kohhran te, NGO te leh Media ten theihtawp an chhuah a sawrkar an tanpui ang khan HIV/AIDS dona kawngah tha tharin sawrkar thawhpui leh se a duh thu a sawi a. HIV/AIDS vei leh Cancer vei tamna state anga kan state lang mek hi kan vei tlan a, siam that hna thawh kawngah kan inlungrual phawt chuan heng natna vei tamna anga kan hmingchhiatna te hi kan thai reh thei a, chu aia pawimawh zawk mi tam tak nunna kan chhanhim thei a ni tiin tanrual a pawimawh thu a sawi a ni.

Dr. ZR. Thiamsanga, Vice Chairman, Health & Family Welfare Board pawhin thu a sawi a. HIV kai hmuhchhuah zinga 65% bawr vel chu sex atanga kai niin, 32% vel hi ruihhlo tih atanga kai an nih bawk thute a tarlang a. Sex hmansualna hi kan pawmpui lo a, mahse mimal nun chu kan control theih vek a nih loh avangin awm lo ang maia ngaih luih aiin sex hmansualna hi a awm a ni tih pawm mai a ngai a. Tihdam theih loh HIV laka an him theih nan a invenna hrang hrang – condom, syringe thianghlim, etc,.an hman a tulna te pawmpui a hun tih a sawi a ni. HIV kaina kawngte chu mimal nun leh mimal duhthlanna in a nghawng leh a siam a nih tlangpui thu te a sawi a. HIV kai thin te hi ruihhlo ngai leh misualte kai tur chauh emaw tihna chu a dik tawk tawh lo a ni a ti a. Kohhran leh khawtlanga mi inhmang leh mi tangkai tak tak zingahte pawh vanduaina avanga HIV kai an awm nual tawh thu te a sawiin he natna tihbaiawm tak vei te khawtlangin kan en dan thlak a hun tih a sawi a. AIDS vei ten inenkawlna tha an mamawh avangin an mamawh damdawi te awlsam zawka an neih theihna tur drop in centre atana hmunhma luahtir kawngah te pawh kan rilru kan thlak danglam a hun a ni a ti.

He program hi Pi. Esther Lal Ruatkimi, Principal Secretary, Health & Family Welfare Department chuan a kaihruai a. HIV chu kan chhungkuaah ala luh loh avanga kutkuangkuahsan mai lo turin kalkhawm te a sawm a. Tuna HIV hrik pai hmuhchhuah bak hi he natna hrik kai si la test lo tam tak an awm a, kan thenawm khawvengah HIV hrik kai an tam chuan kan zavaia mawhphurhna a nih hria in hma ila tlang ang u tiin kalkhawmte a sawm a ni.

Sawihona leh inrawnkhawmna neih a nih hma hian “ HIV/AIDS in Mizoram and Harm Reduction Programme’ tih thupui a hmangin Dr Lalthlengliani, Project Director, MSACS chuan Mizoram dinhmun tlangpui a tarlang a, HIV/AIDS kai awlsam tur deuh a ngaih te venhimna leh zirtirna pek kawnga hmalakna te a sawi bawk a ni. India rama HIV/AIDS vei tam lam survey na chu kum 15 – 49 inkar atangin statistics lak a ni tih a sawi a. He zirchianna atanga a land an chuan tun dinhmunah Mizoram rama HIV/AIDS vei tam lam percentage chu India ram pum percentage aiin a let sawmin a sang zawk a. Kum tina Mizorama HIV/AIDS vei punna hian hniam lam a pan thei lo tih a sawi tel bawk.

Sawihona leh inrawnkhawmna hi hun hnihah then a ni a. Hun hmasa zawkah “Gaps and Hindrances on implementation of Harm Reduction programs’ tih thupui chu Dr C.Lalzepuii, Director, DHS, H&FW in a sawihawnna a neih hnuah sawiho a ni a. Hemi hnu hian “Measures to bridge the gaps and hindrances on harm reduction services – way forward” tih thupui chu Dr K.K. Chhetri, Director, DHME, H&FW in sawihawng hmasain sawihona leh inrawnkhawmna in chhunzawm a ni leh bawk a ni.

Sawihonna leh inrawnkhawmnaah te hian HIV kai hlauhawm zuala ding ni a ngaih ruihhlo ti mite, mipat hmeichhiatna kawnga buan chaklo deuhte’n HIV an kai lohna tura enkawlna hmun Drop in Center te veng hrang hranga NGO kaltlanga kalpui mekte chu chak zawka kalpui a nih theih nan, Harm Reduction program thil tum te, an hnathawh kalphung te, Drop In Center a kal thin te an enkawl dan leh a kalte’n an tangkaipui dan te zau tak sawihona neih a ni.

HIV chu enkawl theih nimahse, kai tawh chuan tihdamna awmlo a nih avangin a darh zel loh nana hmalak a pawimawh takzet thu te, kan rama HIV darh nasat dan te, HIV hi nungchang kaihhawih natna a nih dan te, thalai HIV kai an pun zel chuan kan ram a nghawng chhiat nasat dan tur te zau taka sawiho a ni a. He natna avanga chhiatna thleng mek te leh harsatna lian zawk thleng theite veng tur chuan sawrkar department hrang hrangte, tlawmngai pawl (YMA, MHIP, MUP, Zirlai pawl te, etc.,) branch hrang hrang te, kohhran te tanrual leh tanho, inpuih tawn a ngaih zia te uar taka sawiho niin hmalak zel dan tur te rel ho a ni bawk a ni.

Sawihona leh inrawnkhawmna neih a nih zawhah hian kohhran, NGO te leh Line Department aiawha kal te chuan HIV/AIDS dona kawnga hmalak zel dan tura thawho zel an rem ti tlang a. Dr T.Lalhmangaihi, Principal Director, H&FW chuan lawmthu sawiin huntawp a khar zui a ni.