Home Minister Pu R.Lalzirliana’n “Hlawhtlinna hi taimakna chauhva neih theih a ni a, pumpelhna kawng dang reng a awm lo” a ti. He thu hi nimina Selinga Don Bosco School-in Children’s Day leh Parents Day an hman a tel puinaa a sawi a ni.

Home Minister chuan zirlai te chu thildang zawng aia an zirlai dah hmasa ber turin a chah a, nu leh pa te pawh in lamah an fate tan boruak tha siam turin leh zirtirtu te pawh theihtawp chhuaha zirlaite tana thawk zel turin a fuih a. Khawtlang hruaitute pawhin zirna ngaipawimawha, zirlai te hmakhua an ngaih thiam a tul a ni, a ti bawk. Kohhran School te chuan Mizoram chhung school tha ber dinhmun an luah reng a, Don Bosco School pawh a bial chhunga school tha ber pawl a nih reng thu sawiin he dinhmuna ding tura taima taka thawktu te zawng zawng fakawm a tih thu Minister chuan a sawi. Sorkar sum indaihlohna a nasat avangin duh anga sorkarin kohhran school tanpui a harsat viau laiin tanpui chakawm taka hlawhtlinna an neih zel chuan sorkar tan pawh puih an phurawm hle dawn a ni, a ti bawk.

Pu R.Lalzirliana hian Thingsulthliah damdawi in leh Thingsulthliah a RD Department hmalakna a Community Hall sak tan mek a hmunah kalin hnathawh dan a enfiah nghal bawk a ni.