Hlawhtlinna leh hausakna te hi thawhrimna rah a nih loh chuan a daihrei lovin a itawm loh a ni tiin Home Minister Pu R. Lalzirliana chuan vawiina Oxford Higher Secondary School Siver Jubilee lawmnaa khuallian a nihna ah a sawi.

Home Minister chuan hmasawnna, changkanna leh hlawhtlinna atan zirna pawimawhzia chu thil chiang ni mahse rinawmna leh tih tak takna a telloh chuan zirlai hlawhtling a nih theihloh thu te, eizawnna kawngah pawh dan phalloh thil ti a pawisa tam tak lak luh phahte pawh awm mahse chung mite ai chuan thawhrimna leh rinawmna rah hausaknate chu a hlun zawk a ni, a ti a. Pu R. Lalzirliana chuan zirna in tha leh tha lo tehfung pawimawh tak pakhat chu an zirlaite thiamna inchen vekloin, pass percentage za a za ni lemlo mahse zirtirtuten theihtawp chhuah a an zirtir a, an naupangte chu mi rinawm leh hmantlakah an chhuah em tih a ni, a ti a. Zirna in sang zawkah an kal hnu ah school an kal lai aia discipline lo khauhlo zawk pawh ni se mahni nun vawn leh nun uluk nachnag hre reng turtein leh aia upate, nu lrh patr thu awih nachang hre reng turin a chah a. Minister chuan mihring dam chhung reilo teah hian midangte tan malsawmna nih a hlut ber thu Minister chuan sawiin, kum naupan leh upat in danglamna a siamlo a ni tiin zirlaite chu midang chunga thatna chhuah thin turin a chah bawk.

Vawiina Oxford Higher Secondary School Silver Jubilee lawmna hi Electric Veng YMA Hall-ah neih a ni a. Oxford Higher Secondary School hi January ni 22, 1992 khan din niin, Higher Secondary School-ah May ni 23, 2000 khan hlankai a ni. Infiamna leh drama lamah te Mizoram aiawhin zirlaite state pawnah an lo tel tawh thin a ni.