936/2023-2024

Aizawl, 27th June, 2023 : Vawiin chawhma khan Dr L.Thangmawia, Lengteng bialtu MLA, Human Resources Development Board Vice-Chairman ni bawk chuan Community Development Action and Reflection (CDAR) Complex, Tuirial Airfield, Aizawl atangin "Hlunsanga Malsawmna Scheme" hnuaiah Lengteng bial chhunga rangva inchung la nei lo chhungkaw 45 te tan a rangva sem tur a vai liam.

Rangva vailiamna hunah hian thusawiin Dr. L.Thangmawia chuan “Lengteng bial atanga Zoram zalenna puanna a hming ziak (Signatories) awmchhun, Kawlkulh khua, Pu Hlunsanga(L) hming chawiin HLUNSANGA MALSAWMNA SCHEME chu kumin 2023 January thla khan Kawlkulh a Pu Hlunsanga(L) inah January ni 31, 2023 khan a hawnna neih tawh niin, kum thum chhung (2023 – 2025) atan kalpui chhoh zel tur a ni” a ti a, “He scheme hnuaiah hian Lengteng bial chhunga rangva inchung la nei lo leh rangva inchung tuiek chhe tawhte thlaksak tura ruahmanna siam a ni a, he mi a tana sum tul ang pawh kawng hrang hranga dap chhoh mek zel a ni a, a hlawhtlin nan VC, NGO leh Lengteng bial mipuite tawiawmna ka ngen a ni” tiin “Ngopa leh Khawzawl BDO te leh Lengteng bial khaw hrang hrang VC te kaltlangin Lengteng bial chhunga rangva in la nei lo chhungkaw 28 report dawn a ni a. Rangva ngaihtuah mek a nih laiin chhungkaw 17 rawn luh belh lehin tuna a thawhkhatnaah hian chhungkaw 45 te tan rangva bundle 4 zel pek an ni dawn a, a dawngtu tur hi party induhsakna tel lovin, rangva inchung la nei lo apiang te a zawna zawn chhuah an ni a. A thawhhnihnaah rangva inchung la nei lo hmaih palh an la awm chuan pek leh an ni ang a, rangva inchung tuiek chhe tawhte pawh a tah tawla tuam chhoh zel an ni dawn a ni” a ti.

Dr. Thangmawia chuan Lengteng bial mipuite tawiawmna hlu tak a dawn thin avanga lawmthu sawiin “Chhungkaw khawsak harsa zawkte tana luanchhuah hi kan Bible zirtirna nen a in rem tlat a, mimal ang leh tlawmngai pawl anga mahni thenawm khawvengte leh mi harsa zawkte tana kan luanchhuah thin avangin hnam dang ngaihtuah chuan Mizoramah hmasawnna a kai rual hle a, Lengteng bial khaw sawmhnih(20)-a in ding zawng zawng zinga rangva inchung la nei lo report dawn zawng zawng hi chhungkaw 50 a tling lo a, heng rangva inchung la nei lo chhungkua zawng zawng te hi party thliar lovin tun tumah hian rangva pek vek an ni a, a rangva quality pawh tha tak a ni tih a dawngtuten an lo hre thuai dawn a ni” tiin “Rangva inchung nei hmasa te zingah an rangva hman quality a chhiat avanga inchung far erawh an la awm nual a, hengte pawh hi an chhungkaw dinhmun a zira puih ngai te a theih chin chin a puih zel hi Hlunsanga Malsawmna Scheme tum ber a ni” a ti bawk.

Dr Thangmawia chuan Mizoram UT a nih lai leh state a nih hnu, vawiin ni thlenga kan ram hruaituten theihtawp an chhuah na azarah in leh lo nasa takin Mizoram chhungah a phuisui chho a. Sawrkar hmasa lamte pawhin rangva te semin chhungkaw tam tak an lo tuamhlawm tawh thin a, a lawmawm tak zet a ni, tiin “tun sawrkar kal mekah pawh CM Housing Scheme hnuaiah chhungkaw tam tak Rs 50000 theuh pek an ni tawh a, RD department hian chhungkaw sang tam tak rangva a pechhuak tawh bawk a, tuna Hlunsanga Malsawmna Scheme atan pawh RD Minister Pu Lalruatkima'n engemaw zat min tumsak a ni” tiin sawrkar mek leh sawrkar kalta ten rangva inchung chhungkaw tam takin a neih theihnana an hmalakna te fakawm a tih thu a sawi bawk.

He hunah hian MLA hi SRDC leh HRD Board a thawktuten an tawiawm a ni.