421/2022-2023
Aizawl, 6th May, 2022 : Vawiin chawhma dar 11:00 khan hman khat daih sarang (Single Use Plastics) khap chungchanga a thlakna tur siam chhuah dan kawng zawnna thutkhawm chu Pu C. Lalduhawma, Member Secretary, Special Task Force leh Mizoram Pollution Control Board kaihhruainain PCCF Conference Hall, Tuikhuahtlangah neih a ni a. He hunah hian Mizoram sawrkara Commerce & Industries Department, Horticulture Department, Bamboo Development Agency, NEDFI leh NABARD aiawhte an tel.

He inkhawm kaihruaitu Pu C. Lalduhawma chuan hman khat daih sarang chu sawrkar laipui ruahmanna zulzuia Mizoramah pawh khap a nih thu sawiin, Chief Secretary hoin Action Plan siam a ni a, chumi zinga pakhat, a thlakna tur siamtute’n sum leh paia puihna an dawn theihna tura kawng zawnpuina chu an thutkhawm chhan a nih thu a sawi a. Kal khawmte’n hetiang lama tui mite chu an thawhpui reng theih thu leh sum hmanga an lo puih nual tawh thu leh an puih zel theih thu an sawi hlawm. A thlakna tur siamtute chuan eng zat nge an siam theih tih leh an dinhmun dik tak hriat a pawimawh thu te, entrepreneurs-te leh Self Help Group (SHG)-te tanpui theihna tur Project lian tham deuh tak siam a tul thu te, mau atanga siam toothpick, earbud kuang, bawlhhlawh bawm leh a dangte siam dan kawng zawn ni se an ti bawk. Entreprenuer thenkhatte harsatna tawh, kudam tha an neih loh chungchang sawi lan niin Horticulture Department-te nen tangkawpa tih dan kawng zawn ni se, an kudam neihsâte hman theih dan kawng zawn ni se an ti bawk.