Ni hnih chhung awh Hmarchhak biala HIV/AIDS dona kawnga sawihona ‘NE Strategic Action Plan Consultative Meeting’ Hotel Regency conference hall-a neih chu nimin tlai khan Chief Minister Pu Lal Thanhawla chuan khuallian niin a khar ta.

Chief Minister Pu Lal Thanhawla chuan HIV/AIDS hi alo bengkhawn ngai vak loh thu sawiin, hri hlauhawm tak anihna hian hriat loh theih loh a ni a. India ram pumah hmarchhak state ah te a hluar bik hi kan khawtlang nun leh mahni theuh inbihchian nan kan hman a tha hle a ni a ti a. National AIDS Control Organisation (NACO) in hmarchhak tan HIV/AIDS hluar zel tur dona tur abika ruahmanna an siam chu a lawmawm hle a ni a ti a. Hmarchhak state te hian tluang taka HIV/AIDS do turin infrastructure tha kan neilo chungin hetiang program tha tak in kalpui hi a lawmawm tak meuh a ni a ti a.

Chief Minister chuan tun hnaiah HIV dona tur leh a veite enkawlna tur sum kan dawn thin bakah thisen bagte, testing kits, OST leh Anti Retroviral Therapy drugs te nasa takin a tlahniam a kan harsat phah hle a ni a ti a. Heng kan harsatna te hi min hriatpui a, min chnfel sak thuai turin thuneitute chu a ngen nghal a ni. HIV/AIDS hluarna bik Manipur, Nagaland leh Mizoramah te hian zam lova thapui thawh a, tanrualna nen he hri tihbaiawm tak hi kan hneh thei a ni a ti a. Chief Minister ka nihna angin a dona kawngah leh a veite enkawlna ah theihtawp ka chhuah ang tiin, kan tanrual chuan AIDS hi kan hneh thei a ni a ti.

Chief Secretary Pu Lalmalsawma chuan HIV darhzauna chhan pawimawh tak pakhat chu kan khawtlang nun azir a ni a ti a.Mizoramah hian district pali ah a hluar bik bawk tih a tarlang a ni.

Dr. N.S. Kang, Addl Secretary, NACO, Govt of India chuan hmarchhak bika HIV darhzau tur ven nan ruahmanna thar new concept hman anih tur thu a sawi bawk a. Pu Arun Goyal, Principal Secretary, Health & Family Welfare, Govt of Mizoram pawhin special address a nei bawk.

Consultative Meeting hi a vawi thumna leh a final round a ni a. NACO, Union Ministry of Health & Family Welfare leh MSACS te buatsaih a ni a, Centre for Disease Control leh Voluntary Health Services tena bultum a ni.