Vawiin khan Health Minister Pu Lal Thanzara chuan Regency Hotel, Conference Hall-ah Hmarchhak state 8 a HIV/AIDS dona kawnga Hmarchhak bial anga kalphung thar tur duanna atana inrawnkhawmna ‘Consultative Meeting on North East Specific Strategy on HIV’ hawnna inkhawm a hmanpui. Ni hnih awh tur he inrawnkhawmna hi National AIDS Control Organization (NACO); Sawrkar laipui Ministry of Health & Family Welfare Centre for Disease Control (CDC) India Office leh Mizoram State AIDS Control Society te tangkawpin an buatsaih a ni a. Consultative meeting-ah hian NACO hotu te, CDC aiawh, Hmarchhak state hrang hranga State AIDS Control Society (SACS) aiawhte leh Mizoram Sawrkar Health & Family Welfare Department a hotute bakah MSACS-a thawk te an tel a ni.
Health Minister Pu Lal Thanzara chuan NACO leh CDC ten HIV/AIDS chungchanga Hmarchhak dinhmun hrechianga hetianga a bika kalphung thar Hmarchhak state tin te dinhmun, khawsak phung leh mamawhnate mil a Hmarchak SACS-te duanpui an tum chu lawmawm a tih thu a sawi a. He kalphung thar an duan tum hian HIV/AIDS chungchanga Sawrkar laipuia Health Ministry chuan Hmarchhak bial hi a ngaihven hle an ni tih a ti chiang a ni, a ti. Hei hian Hmarchhaka National AIDS Control Program (NACP) chu tluang leh chak zawka a kalpui theih a beisei thusawiin chu chuan AIDS/HIV tun aia a tlakhniam tir thei a beisei thu a sawi lang bawk a. He huna Hmarchhak state hrang hranga SACS aiawh kalkhawmte chu an mahni state theuha HIV/AIDS darhzau zel venna kawngah theitawp chhuah turin a ngen a ni.
Thusawitu dang Dr. Neeraj Dhingra, Deputy Director General (TI), NACO chuan kalphung thar hnuaiah hian CDC nen tawngkawpin Hmarchhaka AIDS/HIV darhzau zel venna atan a bika project thar buatsaih tum anih thusawiin hei hi NACO-in Hmarchhak state hrang hrangte a thawhpuina budget piah lam, an normal budget khawih danglam lova AIDS/HIV dona kawnga a belhchhahna tur thil thar a ni dawn a ni, a ti. Project tharah hian CDC in vilzuina an duhthawh leh an uluk dawn avangin state thawk tha lo leh tih tha lo chu inhnuhdawh tir theih a ni dawn a ni, ti bawk.
Meeting hawnna ah hian MSACS Project Director Dr. Lalmalsawmi Sailo chuan inlawmna sawiin Mizoram Sawrkar, Health & Family Welfare Department Secretary Pu Arun Goyal, IAS leh CDC aiawh Dr. Sampath te pawhin thu an sawi a ni.
Chawhnu lamah Draft North East Strategy chungchang chu Dr. Neeraj Dhingra’n power point presentation hmangin a sawi hawng a. State tin SACS aiawh ten an state dihmun tarlanna hun neiin Real Time Monitoring chungchangah Dr. Sampath’n presentation a nei bawk.
India ram pumah hmarchhak bial, a bik takin Manipur, Mizoram leh Nagaland te HIV san ber na state an ni a. India ram state dangte ang lo takin hmarchhak bial ah ruihhlo hmansual avanga harsatna hrang hrang bakah ruihhlo avanga HIV kai an tam hle a. Myanmar atangin heng hmarchhak state hrang hrang ah te hian nasa takin ruihhlo tawlh ruk reng a nih bawk avangin HIV dona kawngah state dangin an hmachhawn ve lem loh harsatna an tawk nasa hle. Hengte avang hian hmarchhak bial ah hian HIV a darh nasa bik nia hriat a ni. Ruihhlo hmangsual thin te, mipat hmeichhiatna kawnga humsual daite, mahni anpui kawp thinte zinga HIV a darh lohna atana India ram puma hman tura kalphung duan ‘Operational Guidelines’ te hi hmarchhak bial state hrang hrang ram leilung chhengchhe tak tak nei, nunphung, khawtlang nun leh sakhua thlenga India rama state dangte nena nasa taka danglamna nei hmarchhak bial state-te tan hian a hman theih lohna tam tak a awm a ni tih leh hmarchhak bial tan a bik kalphung hran duang tura ngenna hun rei tak atang tawh khan NACO ah thlen thin a ni tawh a. India ram state thenkhatah HIV a tlakhniam mek laiin, India ram puma HIV darh dan enchianna/zir chianna HIV Sentinel Surveillance atangin hmarchhak bial a HIV a darh chho zel a nih tih hriat anih atangin NACO chuan hmarchhak bial bik tana kalphung ‘strategy’ duan a lo remti ta a ni.
He strategy duanna atan hian Manipur, Nagaland ah te meeting neih a lo ni tawh a, tun hi a tum thumna niin a tlangkawmna a ni tawh a ni.
