India ram State khawpui dangte anga hmarchhak State khawpui ten hamthatna an chan ve theih nan Sorkar Laipui chuan Asian Development Bank sum pukin North Eastern Region Urban Development Programme (NERUDP) a duang a, Programme thawhkhatna Phase-I hnuaia hmarchhak States 5 - Mizoram, Meghalaya, Nagaland, Sikkim leh Tripura khawpui theuhte tana hmalakna inhrilhhriatna (awareness programme), Ministry of Urban Development, Government of India huaihawt chu vawiin chawhma dar 9:30 khan Aijal Club Conference Hall ah UD&PA Minister Pu Zodintluanga’n a hawng.
    Minister chuan hawnna thu sawiin Mizoram mamawh tak khawpui tihhmasawnna programme puitham tak Sorkar Laipuiin a duan avangin lawmthu a sawi a, he hna hautak tak thawktu tur Department naupang tak UD&PA  kaihruai tura mithiam tak tak an lo kal thin chu lawmawm a tih thu a tarlang bawk. India rampum ah thingtlang mi te chawikanna uar taka kalpui a ni thin a, khawpui tihhmasawnnna tur lam kalpui a ni ve ta chu lawmawm tiin Mizoram khawpui Aizawl pawhin nasa taka a chhawr tangkai tur thu a sawi lang bawk. Mipui hamthat nana Sorkar hmalakna te chu mipuiin man tlawm zawka an chhawr theih nan Sorkar sum hmangin tihhniam a ni thin a, heng enkawlna hautak zia te hi mipuiin kan hriatchian a, a enkawlna lamah pawh mawh kan phur theuh a ni tih kan hriat tlan a pawimawh a ni, a ti. Aizawl khawpuiah mi kan inhnawh chep em em a, inthiarna thli leh bawlhhlawh senghawi lamah kan la hniam a, heng lamah te hian mipui kan harhchhuah zel a tul a, khawvel hmasawn zelah kan nunphung leh khawsak phung te pawh kan changkan ve zel a tul tak zet a ni, a ti bawk.
    Inkhawm kaihruaitu UD&PA Secretary Pu R.L.Rinawma, IRS chuan mipui tana sorkar hmalakna te hlawhtling tak tak tur chuan mipui leh tlawmngai pawl te an tel ve zel a tul a ni tiin sorkar hmalakna te thlawpa thawhpuiah a sawm. Awareness programme hmangtu te chuan ram leh hnam tana hlawkpuina an puakchhuah ngei a beisei thu a sawi bawk.
    NERUDP leh North Eastern Region Capital Cities Development Investment Programme (NERCCDIP) hmalakna kengkawhtu ber State Investment Programme Management & Implementation Unit (SIPMIU) Project Director Er Valbuanga chuan an hmalak mek dan te leh hmachhawp te a sawifiah a, heng ruahmanna te hi kan duh a kan inpeih phawt chuan sum hman tur chu a awm sa reng a ni, a ti. Project I hnuaiah tui thianghlim dahkhawlna tuizem siam te leh tui meter vuah te chu zawh fel thawkhat a nih thu a tarlang a, tui semkual dan tha zawk leh tui pump nana power supply a hran hlaka siam te, khawpui zun/ek thli leh tuichhia lakkhawm leh sawngbawlna te, bawlhhlawh awmze nei zawka sawngbawl dan turte chu bawhzui chhoh mek a nih thu te a sawi lang bawk.
    Awareness Workshop on North Eastern Region Urban Development Programme hi nimin khan neih tan niin PHE Minister Pu S.Hiatoa’n a hmanpui a, Workshop-ah hian Mizoram-in ‘2011 Best Project Implementation Award’ a dawn chu state dangte tana entawntlak a nih thu Pu Ashutosh Joshi, Director (Urban Development), Government of India chuan a sawi lang. Workshop-ah hian Japan Sanitation Consortium atanga mithiam lokalten septic tank tha chi, Japan rama an hman dan leh a enkawl dante an zirtir bakah, khawpui cheina kawnga ruahmanna siam dante zirho a ni a; he hna-in a kaihhnawih department hrang hranga officer-te an tel kim hle a ni.