Vawiin chawhmaah khan State Guest House Conference Hall-ah Pu Anil Madhav Dave, Union Minister of State(Independent Charge) for Environment, Forest and Climate Change chuan Engineer te, NGO te leh Chanchibumi te a kawm a. Hemi hma hian Bethlehem Vengthlangah Advance Research Centre for Bamboo and Rattan (ARCBR) tlawh in Pu Lalrinmawia Ralte, Environment & Forest Minister nen thing tiak an phun a ni.

Press conference a neih hma hian Pu Anil Madhav Dave chuan PHD leh P&E Department hotute bakah NGO te a kawm hmasa a. Engineer ten Forest Clearance an hmuh har thin avanga state hmasawnna ruhrel kalpui mekah harsatna an tawh chungchang an hrilh chu Union Minister hian lo bawhzuipui a tum thu a sawi a. Ramri panna leh ramri hrula kawng laih hna te bakah state hmasawnna ruhrel dinna tur project te chu Central sawrkar in a dah pawimawh bik thu sawiin chung hmalakna ti khaihlak zawngin Forest Clearance tih khawtlai a ni lovang a ti.

Biodiversity and Nature Conservation Network(BIOCONE) leh Association for Environmental Preservation(ASEP) te nen inkawm leh in anni hian an hmalak tumna kawnga pui tura sawm in Union Minister hnenah hian Concept Paper 2, BIOCONE buatsaih Conservation of River Tlawng and its tributaries leh ASEP buatsaih, Economic-tourism Project at Serlui B te chu an hlan nghal a. Union Minister chuan amah ngei pawh NGO ah hunrei tak a lo hmang tawh thin tih sawiin NGO te hmalak tum dan chu a thlawp zawng a nih thu a tarlang a. A rawn zin leh hunah project kimchang zawk hmuh a beisei tih a sawi a. Tlawmngai pawl te fuihna sawi chhunzawm in NGO te rintlakna chu a taka hnathawh ah a nih thu tarlangin Mizoram chhunga NGO te chu state hmasawnna tura chak zawka hmala tur in a sawm a ni.

Vawiin a hun a hman na ah te hian Union Minister hi State Environment & Forest Minister Pu Lalrinmawia Ralte bakah Pu Lalram Thanga, Principal Secretary & PCCF leh E&F Official ten an tawiawm a ni.

Environment & Forest Minister Pu Lalrinawma Ralte chuan nimin tlai khan  Union Minister hi State Guest House-ah zanriah a buatsaih sak a ni.