No.1617/2021-2022

Aizawl the 29th July 2021: Vawiin chawhnu khan Dr.H.Lalthlangliana, Deputy Commissioner, Kolasib district chuan ni 26 July 2021-a Vairengte IR Post-a Assam Police leh Mizoram Police-te innawrna chungchang leh ramria invenhimna kalpui chhunzawm dan chungchangah thutharlakhawmtute a kawm a, Pu Lallawmawma, Addl. DC leh Pu Hmingthanzuala, DIPRO-ten an telpui a ni.

Dr.H.Lalthlangliana chuan Vairengtea silai hmeh puah chungchangah Assam Police-ten tihloh theih loh dinhmun a an nawrna vang a nih thu leh he thil thleng avanga nunna chan leh hliam an awm chu pawi a tih thu a sawi a, chan tha zawk chang kan ni anih pawhin nunna hial channa thil thleng chu chapopui lova, mitthi chhungte ngaihtuah tel chunga kan chet zia leh tawngkaahte inngaihtlawmna leh lainatna tilan a pawimawh thu a sawi. Ramria buaina thleng a nih avangin tun hun hi inpuahchahna tha zawka kalpui hunlai tak a nih thu sawiin Dr.H.Lalthlangliana chuan tukin khan ramri hrul a Mizoram Police duty-te tlawhchhuakin endikna leh inthlahdah lo tura infuih tharna a neihpui thu a sawi bawk a ni. “Tawlh let kan tum lova, kan Police-te huaisen zia hi rampum hriat ah pho lan mek niin hmingthatna pawh kan chang mek a ni,” a ti a,”Hmingchhe thiang kan ni tawh lova, tuna kan hmingthatna venghim tur hian theihtawpa tan kan lak a ngai a ni,” a ti.

Ramri veng tura Police duty-te dinhmun tiderthawng thei zawnga thlalak leh Video thehdarh awm lo turin mitin inchah a pawimawh thu sawiin hengte avang hian ruahmanna a hlawhchham phah theih thu a sawi bawk a ni. Inkahna thleng avanga Assam ramri hrula khua awmten lirthei dangin rel kawng thlenga dan tum a hma an la ni a hriat a nih thu sawiin heng buainate hi chinfel tum mek a nih rualin nitin mamawh lak khawm kawngah midangte ngaihtuah tel chunga khawsak thiam a tul thu a sawi a. Ramri venhim hna tha zawk a kalpui a nih theih nan mipuite chu tlawh tam rih lo turin a ngen nghal bawk a ni.