Nimin tlai khan Aijal Club-ah Health Multipurpose Service Association (HMSA) chuan Health & Family Welfare Minister Pu Lal Thanzara chu lawmpuina thuziak hlanna neiin chawhlui an kilpui nghal. He hun hi Health & Family Welfare Department Principal Director, Dr. K. Lalropari pawhin a hmanpui a ni.
He hunah hian Health Minister Pu Lal Thanzara chuan health worker te chu phunnawi lova Mizoram zokhaw kilkhawr ber ber ah te Health Department kut ke ber nia mipui tana hriselna kawnga hna an thawk chu fak an phu hle a ni, a ti a. Hriselna kawngah changtlung zawka hma lak mek tum anih thusawiin Minister chuan hemi atan tunhnai khan Lunglei Civil Hopsital te, Aizawl Civil Hospital te leh Falkawn Referral Hospital te a fan kual thu a sawi. Kawngpui tha te, damdawiin tha leh doctor tha te leh zirna in tha te nei belh zel theih nan Sawrkar chuan theitawp chhuahin hma a la mekin a la zel dawn a ni, a ti a. Hriselna kawngah thil tha thlen zel a duh thu sawiin, a te ber atanga a lian ber thlengin thawhhona boruak tha neih a pawimawh a ni, a ti bawk.
HMSA chuan an hnathawhna leh an service kawnga harsatna an tawh te Health Minister hnenah an thlen a. Health Minister chuan an thu thlen te chu Department hotute nen sawikhawm a, a tih theih ang te chu bawhzui sak a tum thu hrilhin Sawkar in sum leh pai lamah harsatna a hmachawn te chu hriatpui turin a ngen bawk a ni.
Health Multipurpose Service Association hi Community Health Officer, Health Supervisor leh Health Worker-te intelkhawm pawl an ni a, Mizoram ah hian Health Worker 1400 vel awmin, chung zinga a zat ve chu contract in an thawk mek a, Health Supervisor mi 180 vel awmin Community Health Officer mi 27 vel an thawk mek bawk a ni.
