Hmunnghak khua chuan an khaw kum 100 tlin lawmna leh YMA kum 60 tlin lawmna ni hnih chhung awh programme an buatsaih a. Vawiin a ni hnih ni hian bialtu M.L.A, Mizoram Legislative Assembly Speaker Pu Lalrinliana Sailo chu khuallian a ni.

Pu Lalrinliana Sailo chuan Hmunnghak khuain kum za hmel a hmuh bakah YMA Golden Jubilee hmang kawp theia Pathianin a hruai chu lawmawm a tih thu a sawi a, khaw mipui zawng zawngte duhsakna a hlan.

Speaker Pu Lalrinliana Sailo chuan politics hmansual avanga khua leh khua, khawtlang leh thenawm khawvengte inkarah inngeihlohna awm thin chu a vei thu sawiin, politics chu khawtlang leh ram siamthatna atana hman zawk tur a nih thu kalkhawm te a hrilh a. Hmunnghak Centenary-a kokim taka hun an hmang thei hian inlungrualna, hmangaihna a lantir tak meuh a, hun lo kal zel turah pawh inhmangaih a, in lungrual zel turin khaw mipui te a fuih bawk a ni.Thing leh mau humhalhna kawngah tan la thar zel turin khuallian hian a fuih a. Thing leh mau tihchereu hian mihring nun a tih tawi theih dan te, nu nau pai mek te tan a a hlauhawm theih dan mi thiam leh zirmiten an sawi chu hre rengin, Speaker chuan Hmunnghak Khaw Centenary hian thing leh mau, nungcha humhalhna kawngah harhtharna thlen ngei se a duh thu a sawi a ni.

Vawiin programme-ah hian Hmunnghak khaw mipui te chuan an khaw Lal chawimawina hun an hmang a, chawimawina thuziak hi Pu Lalrinliana Sailo chuan a hlan a. Hnam changkang leh fing tak tak chuan an lal te, an ro thil leh hmun hluite an hlutin an zah em em a, chutiang anga Hmunnghak khuain Lal te chawimawi leh ngaihhlut nachang an hria chu ropui a tih thu a sawi a ni.

Hmunnghak khaw Centenary lawmna leh Hall sakna atan Pu Lalrinliana Sailo chuan thilpek a hlan a. Hmunnghak khua a kum upa te pahnih - Pu Lungmawia, kum 92 leh a nupui Pi Rinpuii, kum 90 te hnenah Centenary lawm nan khawl a pe bawk a ni.