NLUP Implementing Board Chairman Pu J.H Rothuama chuan vawiin khan Champhai North leh South chhunga Commerce & Industries Department hnuaia NLUP beneficiary-te hnenah NLUP 3rd Phase 2nd installment tanpuina chu Champhai Commerce & Industries Department, K&T Training Centre Building-ah a sem a. He hunah hian beneficiary-te chu Sorkarin eizawnna bul tanna a thlawn a a pek te chu hlawhtlinpui ngei tura fuihin, “hna zawngtu ni lova, hna siam chhuaktu ni thei tur khawpa thawhrim a tul a ni,” a ti.

Pu J.H Rothuama chuan, khawvel hmun danga an tih ngai loh mipuiten eizawnna ngialnghet an neih theihna turin Mizoram Sorkar chuan NLUP hmangin mipuite rahbi a siam sak thu sawiin, Commerce & Industries hnuaia NLUP tanpuina dawngtu te chu a thlawn a Sorkarin khawl leh pawisa a pek chu taima takin, hlawhtling ngei tuma hmang tangkai turin kalkhawmte chu a chah a; harsatna tam tak awm thin mah se, a thim lam thlir lova a eng lam thlir thin chu hlawhtlin bul tanna a ni, a ti.

NIB Chairman chuan Champhai District chu sumdawnna kalkawng, mi taima leh tumruh tana eizawnna tha tak neih mai theihna tur hmun a ni tih sawiin, kan eizawnna te hi Mizoram mai ni lo, India ram leh khawvel ramdang te nen pawha insumdawng tawn thei tur khawpa rilru pu in, state dang te entawn leh an mamawh siamchhuaktu ni thei turin kan intuai hriam tur a ni, tiin kalkhawmte chu a chah a. Pu J.H. Rothuama chuan NLUP hmalakna chu a tawp mai dawn loh thu leh, NLUP enkawl zuina tur ruahmanna tha tak NEDP hmangin Sorkarin mipuite tan hma a la zui mek thu a sawi bawk.

NLUP sem inkhawm, Pu R. Laltanzuala, Functional Manager, District Industries Centre, Champhai kaihhruaiah hian Champhai District Addl. Commissioner Pu. C. Lalzarliana leh NIB Chief Media Officer Pu David L.Thangliana ten thu an sawi bawk a ni.

NLUP sem inkhawmah hian Champhai District huam chhung a 3rd Phase NLUP Beneficiaries, Tailoring trade thlangtu chhungkaw 76 hnenah Puanthuikhawl set 76 (Sewing Machine, Overlock leh Embroidery Machine) leh pawisa fai Rs. 21,480/- theuh sem niin, a vaiin Rs. 16,32,480/- sem a ni.

Hei bakah hian Champhai North huam chhunga 3rd phase NLUP beneficiary chhungkaw 48, Commerce & Industries hnuaia trade chi hrang hrang thlangtute hnenah 2nd Installement Rs. 24,28,000/- leh Champhai South huam chhunga 3rd Phase beneficiaries chhungkaw 117 te hnenah Rs.58,44,500/- sem nghal a ni bawk.

Vawiina Commerce & Industries Department hnuaia NLUP tanpuina sem hi a pawisa faiin Rs.99,04,980/- leh puanthuikhawl 76 sem a ni.