3335/2023-2024

Hnahthial the 12th January 2024: Vawiin khan Hnahthial District Addl DC Pu Lalvenhima chuan Nehru Yuva Kendra, Hnahthial buatsaih National Youth Day (thalaite Ni) chu RD Conference Hall, Hnahthial bazar-ah khuallian niin a hmanpui.

Khuallian Pu Lalvenhima chuan kalkhawmte chu National Youth Day chibai bukin programme tha tak buatsaih a nih avangin lawmthu a sawi. Hun vawn dik (punctuality) pawimawh thu sawiin mitin hun neih zat a in ang vek a ti a, a hmang tangkai thiam apiang dinchhuakin an hlawhtling mai thin a ni, a ti. Hun vawng diklo mihring smart an awm ngai lo tiin thil tihna kawng engkimah hun vawng dik hram hram thin Turin a chah a ni. Kalkhawm zirlaite chu chahin chawr chhuahna a pawimawh ber lo a ti a, taimakna, tumruhna leh chhelna nen chuan huphurhawm a awm lo a ti bawk a ni. Pu Lalvenhima chuan zirlai te chu an tumah chiang se tiin rinawmna nen theihtawp chhuah turin a chah a, an kal lehzelna turah duhsakna a hlan nghal bawk.

Vawiin programme-ah hian Road Safety Week denchhanin Awareness campaign neih nghal niin Pu K Lalnithanga, SDPO, Hnahthial hneh atangin road safety chungchang ngaihthlakna neih a ni nghal bawk. National Youth Day hi Pu J Lalnunfela, Vice President, Hnahthial Bazar Branch YMA chuan kaihruaiin welcome address a nei nghal a, Youth Day chungchang sawi hawnna chu Pi Mercy Sellate, DD, NYK Hnahthial chuan neiin Pu Lalbiakkima, President Hnahthial Bazar Branch YMA chuan lawmthu sawiin hun tawp a khar a ni.

National Youth Day denchhan hian Nehru Yuva Kendra, Ministry of Youth Affairs, Govt of India chuan YMA Hnahthial bazar nen tangkawpin ‘Declamation contest on my Bharat-Viksit Bharat@2047’ (thusawi intihsiakna) a buatsaih nghal a, he intihsiaknaah hian educational institution/ youth club aiawhin mi 2 zel an tel thei a ni. Mi pakhat atan thusawi hun minute 7 zel pek an ni a, thalai kum 15-29 inkar ten intihsiakna neiin hun hman ho a ni.

Swami Vivekenanda pianni, January ni 12 chu sawrkar laipuiin kum 1984 khan National Youth Day-ah a puang a, chumi hapta chhung zawng January ni 13-19 chu National Youth Week a hman thin niin thalaite ram tana an pawimawhzia phochhuahna leh inzirtirnan a ruahhman a ni. Tlawmngaihna (spirit of service & voluntarism) pawimawhzia inzirtirna bakah Swami Vivekenanda zirtirna te puanzar thin a ni bawk a ni.