No.1011/2020-2020

Vawiin khan Hnahthial DC Conference Hall ah Hnahthial District Bawrhsap Pu Vanlalmawia leh Mizoram sorkar hnuaia Agriculture Development Board member-te Pu Lalropuia Pachuau leh Pu Lalsangliana Hnamte hovin meeting neih a ni.

He hun hi Pu C.Vanlalhruaia SDAO Hnahthial chuan kaihruaiin Agriculture Department Hnahthial-in Covid 19 hrileng avanga an hmalakna hrang hrang tarlangin kumin 2020 hian Hnahthial Sub Division huamchhungah Covid 19 hrilen hmaa Thingtlang Lo vah 1106 Hectare a nih thu leh Covid 19 hrilen hnuah Hectare 19 chulrih a nih thu a sawi bawk.

He hun hmanpuitu Hnahthial District Bawrhsap Pu Vanlalmawia chuan "Khawvel hmun hrang hrangah Covid 19 avangin Industry tam tak an chawl thup a, mi tam tak eizawnna a tawp a, khawvel economy pawh a tla hniam mek a. He harsatna laka min khaichhuak theitu tur chu Agriculture leh a kaihnawh hrang hranga hmalak hi niin Covid 19 hrileng avanga harh tharna kan chan chhoh mek hi ti nung zel ila, Pathianin ram tha tak min pek hi hmang tangkai ang u" tiin hmasawnna leh hlawhtlinna chu taima taka hnathawh a nih mai thu a sawi bawk a ni.

Pu Lalropuia Pachuau, Agriculture Development Board member chuan thu sawiin "Kum 2018 - 2019 khan Mizoram in kan mamawh hmun thum a thena hmun khat vel Buh kan thar a, kumin hian kum danga kan siam ngai loh harsa lutuk lova Buh leh thlai kan thar theihna tur hmun te hi siam ang u, chumi atan chuan sorkar pawh a inhawng em em a. Nitina kan mamawh hrang hrangte hi thar chhuak vek theilo mah ila thil thenkhatte hi chu intodelh tura kan thar chhuah a hun ve tawh a ni" tiin Sorkar Flagship Programme SEDP hnuaiah Vaimim chi quintal 174 chu ram Acre 2500 a zauah chin mek a nih thu leh Kut hnathawktute tana sorkar laipui scheme hrang hrangte a tarlang bawk a ni.

He huna kakhawmte hian Hnahthial District chhunga ram dinhmun hrang hrangte tarlangin zawhna leh chhanna hun an hmang bawk a ni.