3614/2022-2023
Hnahthial the 16th February, 2023 : National Handloom Development Programme hnuaiah nimin khan ZOHANDCO buatsaihin Electric veng Community Hall Hnahthial-ah District Handloom Expo neih niin District bawrhsap Pu R.Lalremsanga chuan Khuallian niin a hawng a, "tualchhung thil kan ngaihhlut thiam a tul a, market tha turin hnamdangte duh zawng tharchhuah leh siamchhuah a tul a ni" tiin ZOHANDCO pawh heti lam hawia ke pen tulin a hriat thu a sawi a ni.

Khuallian Pu R.Lalremsanga chuan Hnahthial District mipuite tan ZOHANDCO in District Handloom Expo an buatsaih chu lawmawm a tih thu leh Mizo thuam chi hrang hrang chhawpchhuah te chu kan hma lawka Chapchar Kut lo thleng tur inbuatsaihna atan pawh thil inhmeh tak a nih thu sawiin "ZOHANDCO hian a tum ber pakhat chu puantahtute tana remchang leh awlsam siam sak a ni" tiin mi thenkhatin an ni khat hlawh ngaihtuahin a hlawk lo tih vanga an thawk duh lo ringawt thin chu thil tha lo tak a nih thu sawiin "Thawh tur dang hre chuang si lova peih loh hi hmasawnna daltu a ni" tiin Puantahtute chu Mizoram pela thawnchhuah tlak leh duh tur ngaihtuah chhuak thiam turin a fuih a, "Mizo kan la tlem si a, Market tha turin hnamdangte duh zawng tur siamchhuah hi a tul a ni" tiin tun sorkar a ZOHANDCO din thar leh a nih dan bakah Hnahthial District dinhmun a tarlang bawk a ni

He hun hi Pu Rodingluaia, Asst. Manager ZOHANDCO chuan kaihhruaiin Rev. K. Zoramchhanthanga chuan Pathianna hnena inhlanna hunserh hmang a, Pu C. Lalrinmawia, Manager ZOHANDCO chuan keynote address sawiin Zaithiam an zai bakah Pi C. Lalmuanpuia, Asst. Manager chuan lawmthu sawiin hun a khar a ni

Hnahthial-a District Handloom Expo hian tunkar Zirtawpni (17th Feb) thleng a awh dawn a, Stall 15 hawn niin Mizo thuam chi hrang hrang 10% atanga 20% inkara tlawmin lei theih a ni