Aizawl the 23rd December, 2021 : Hnahthial District Bawrhsap Pu R.Lalremsanga hovin vawiin khan a Office Chamber-ah Hnahthial District chhunga dan leh thupek kenkawh chungchang sawihona hun hman niin YMA Sub-Hqrs. Hnahthial hruaitu thlan tharte nen inhmelhriatna hun hman nghal a ni bawk.

He hun kaihruaitu District bawrhsap Pu R.Lalremsanga chuan Dan leh thupek chungchanga hmalaknaah Hnahthial district chhungah harsatna a awm an hriat loh thu sawin "Krismas leh kumthar hi Mizo Kristian te hunpui pawimawh tak a ni a, kan District mipui ten hlim leh thlamuang taka kan hman ka beiseiin rilru zau tak kan put tlan pawh a ngai a ni. Thalaite pawhin midangte tana harsatna siam lovin an mahni zawnah hlim takin hmang sela, duty-te pawhin hriatthiamna tam tak neih a tul a ni. Harsatna te hi kan inrin lawk loh laia lo thleng thut thin a nih avangin kan inrin reng a tul a, chutiang harsatna thleng a awm chuan a rang thei ang berin Magistrate leh Police-te hrilh hriat thin a tha hle a ni" tiin NGO hruaitute chu thu lai la thiam tura beisei an nih thu a sawi a, Covid-19 hrileng darh zel avangin fimkhur tlan a tul thu pawh sawiin District bawrhsap chuan "mipuite kan him tlan theih nan kumhlui thlah zana zanlai inkhawm pawh neih loh nise kan ti a, Covid-19 vaccine pawh kan District chhungah hian za-ah 100 pek tumin ruahmanna siam a ni a. NGO te nen thawihtawp chhuaha kan tan ho a ngai hle a ni" tiin NGO te chu thawhho puiah a sawm nghal a ni. 

Hnahthial SP Pu Lalbiakkila pawhin engemaw buaina leh harsatna thlen palhah Hnahthial district Police-te chu an inralring reng tih sawiin "mipui ten thlamuang taka Krismas leh kumthar an hman theihna atan hian Police te nasa takin kan inbuatsaih a, duty tur pawh ruahmanna kan siam felin Hnahthial khawpui pawn khaw hrang hranga Police awm lohna hmunah te pawh patrolling neih thin tum a ni" tiin Hnahthial chu District ralmuang tak a nih reng theih nan NGO hruaitute chu thawhpuiah a sawm a, NGO te chu ram leh khawtlang inrelbawlna kawngah an pawimawh thu leh Hnahthial District tih changtlun chhoh mekah pawh NGO hruaitute sukthlekah thil thui tak a inngah thu a sawi bawk a ni.

He hunah hian Krismas leh kum thar vuak veta YMA Sub-Hqrs. Hnahthial ten a tul anga an hman turin District Bawrhsap Pisa chuan Rs.8000 an hlan a, SP Office chuan Rs.10000/- an hlan bawk a ni