No.3598/2021-2022
Aizawl, the 8th January 2022: Hnahthial District Bawrhsap Pu R.Lalremsanga chuan vawiin khan District chhung South Phaileng khua tlawhin khawtlang hruaitute nen an VCP Pu Lalmuankima In-ah an inkawm a, Govt Middle School leh Primary School building bakah Pavillion te enfiahin Sorkar hmalakna chu tha taka tawiawm thin turin VC leh NGO hruaitute a chah a, tanpuina thilpek a pe bawk a ni.
Hnahthial District chu District enkawl nuam tak khaw 32 awmna a nih thu Pu R.Lalremsanga chuan sawiin District intodelh a nih theihna turin theihna a awm a, khaw hrang hrang ten engemaw tak thawnchhuah tham thar leh siamchhuah a tul thu a sawi a, chutianga tan la tur chuan khawtlang hruaitute a fuih a ni. Faina leh Ziak leh chhiar thiam tam lamah tan lak a ngaih thu pawh sawiin District bawrhsap chuan "Faina hian hriselna a keng tel a, khua a hrisel loh chuan hmasawnna tak tak a awm thei lo" tiin Faina kawngah theihtawp chhuah turin a fuih bakah "khawvel hmasawnna thang zelah kan mut hmun atangin khawvel tukverh a dahchhuah theih tawh a, Zirna in a kal rualte an kal vek theih nan tan kan lak a tul a, lehkhathiam tamna khua chu a ngaihnep theih loh" a ti bawk.
Covid-19 hrileng avangin harsatna hrang hrang a thlen thu leh tunhnaiah Hnahthial District-ah hri kai hmuh chhuah thar an pun thu pawh sawiin District bawrhsap Pu R.Lalremsanga chuan "Covid-19 hri kaite inenkawlna senso hi a sang thin hle a, Vaccine lak hlauhawm anga sawi an awm thin hi a pawi hle a ni. Chutihlaiin Phaileng South khuaa kum 18 chunglam ten Covid-19 vaccine za-ah za (100%) in la vek hi lawmawm kati in kum 15 - 18 inkar vaccine pek kalpui mekah pawh hian la thei tur chin chuan in lo lak leh vek ka beisei a ni" tiin Hnahthial District khua 8-ah Covid-19 Vaccine za-ah za (100%) la an awm tawh thu a sawi bakah Zuk leh hmuam tih chu tul lova sum khawhralna leh taksa hriselna ti chhetu a nih avangin inthiarfihlim turin mipuite a chah bawk a ni.
He hunah hian Pu Lalneihthanga Colney BDO chuan khawtlang hmasawnna tur atan an theih chinah theihtawp chhuah zel an tum thu sawiin "tunah hian Mizorama RD block hrang hrangin MGNREGS an kalpui mekah a ti tha ber 'Best Block' ah thlan kan ni a, hei hi mipuite nena kan thawhhona niin chhawm nun zel ka duh a ni" tiin VC leh khawtlang hruaitute chu an hnathawh hmanga Pathian chawimawi tur leh piangthar hnathawha thawk thin turin a chah a ni.
Hnahthial District VC Association President Pu F.Laldinthara pawhin thu sawiin "Hnahthial District ah Phaileng South rin luh ani hi a awmin nangni pawhin lungdam takin inpawm niin kan hriaa kan lawm hle a ni" tiin VC anga hmalakna kawngah theihtawp chhhuahpui an inhuam thu leh an tlanchhiatsan loh tur thu a sawi bawk a ni.
Inkawm khawmna kaihruaitu Pu Lalmuankima, VCP, Phaileng South chuan Hnahthial District-ah an awm chu lawmawm an tih thu sawiin Pisa dawr leh thil hrang hrang tih an awlsam phah tih a sawi a, Hnahthial District Bawrhsap lo ni tawh ten an khua ngeiah an tlawh thin chu lawmawm a tih thu sawi bawkin an khawtlang mamawh hrang hrang te chu District Bawrhsap hnenah hian a thlen nghal a ni.
Hnahthial District Bawrhsap Pu R.Lalremsanga hian vawiin vek khan Bazar veng, Hnahthial in Thlanmual thar tur atana an buatsaih Darkhuang tlang, Thiltlang ram chu a hmunah a enfiah bawk a ni.
Attachment
- Loading attachment...
