No.4926/2020-2021

District Hospital Hnahthial-a Mini RT-PCR (TrueNat Quattro) Bio-Safety level-2 Laboratory dah thar chu nimin khan District bawrhsap Pu Vanlalmawia chuan khuallian niin a hawng a, SP Pu Lalbiakkila chu Khualzahawm a ni.

Hawnna inkhawm hi OPD Building-ah neih niin Pu Vanlalmawia, Dy.Commissioner Hnahthial chuan "Covid-19 hian kan nunphung a nghawng nasa in kan Economy, Society leh Culture nasa takin a nghawng a, chhiatni thatni kalphung thlengin her rem a lo ngai ta a, chu chu kan invenna atana pawimawh anih avangin Sorkar ruahmanna anga kal chhunzawm a, thuawih taka awm zel turin mipuite ka ngen nghal a ni" tiin Thuawihna chu himna a ni tih hre nawn fo turin mipuite a chah bawk a ni.

Covid-19 dona kawngah State Sorkar ruahmanna angin Hnahthial District ah February thla atang DLTF leh VLTF theihtawpin hma an lak thu District Bawrhsap Pu Vanlalmawia chuan sawiin "an thawhrimna te, an hahna leh sum leh paia insenna leh min inphal te avangin he kan hri dona ah hian nasa takin kan hlawhtling a tih theih a, hemi atana sum leh pai thawhtute leh hun leh tha senga tan la tute zawng zawng chungah lawmthu ka sawi takmeuh a ni" a ti bawk

Mizoram Sorkar hmalakna kal zelah Hnahthial District ah TrueNat khawl bun fel a ni leh hman tan theih a ni ta chu lawmawm a tih thu District Bawrhsap Pu Vanlalmawia chuan sawiin "Covid-19 kan beihna kawngah a tangkai hle dawn a, Covid-19 Test na mai piah ah medical test tam tak a ti theih dawn a. Pathian khawngaihna a zarah Covid-19 hian min la kiansan hun te pawh a la awm ang a, chung hunah pawh chuan khawl tangkai tak a la ni chhunzawm zel dawn a ni" a ti

Khualzahawm Pu Lalbiakkila SP Hnahthial pawhin thu sawiin "Covid -19 kan dona kawngah hian kan dinhmun dik tak kan hriatchian hi kan khawtlang leh ram tan a tha a, kan inhriat chian loh chuan hmalak zel dan tur a buaithlak thin a ni" tiin "Hnahthial District mipui ten Covid-19 kan vei leh vei loh awlsam taka kan inendik theihna tura Sorkar-in Truenat khawl min rawn pe hi a lawmawm takzet a ni" a ti a. Khawvel changkang chho zelah investigation tih nan hmanraw tha a ngai a, Covid-19 kan vei leh vei loh awlsam taka kan inhriat theihna atan hian Doctor tam tak aiin TrueNat khawl pakhat chu a pawimawh zawk thu Hnahthial SP Pu Lalbiakkila chuan a sawi bawk a ni.

He huna Technical report petu Dr.R.Lalsanglura, Nodal Officer chuan Hnahthial-a Mini RT-PCR (Truenat Quattro) Bio-Safety level-2 Laboratory bun fel chu thla hmasa August Ni 24 khan State Sorkar atangin endik a nih thu leh Ni 26 August-ah State sorkar chuan pawm sakin ICMR-ah phalna an dil thu leh ICMR chan Ni 1st Sept.2020 khan an pawmpui thu a sawi a. Vawi khatah mi 4 sample test theih a nih thu leh Darkar 24 chhungin sample 100 test hman beisei anih thu a sawi bakah he khawl hmang hian Covi-19 chauh ni lo, natna chi hrang hrang 16 zet endik theih a nih thu sawiin "TrueNat khawl hi Covid-19 hrileng kara Malsawmna a ni" a ti

Hawnna inkhawm kaihruaitu Dr.Lalrengpuii Ralte chuan Sorkar hmalakna chak tak avangin District Hospital Hnahthial chuan hmasawnna hmelthar an hmuh nasat thu a sawi bakah Covid-19 do kawnga hmalakna ah Hnahthial District chhung mi 248 te Swab sample chu ZMC-a RT-PCR khawlah endik niin chung zinga mi 2 te chu an positive thu a sawi a, mi 51 dang pawh Rapid Antigen Test hmangin endik an nih thu leh an Negative vek thu a sawi bawk a ni

District Hospital Hnahthial-a hawn thar, Mini RT-PCR (TrueNat Quattro) Bio-Safety level-2 Laboratory-ah hian nimin chawhnu khan sample 6 endik hnathawh chhunzawm nghal a ni.