No.867/2020-2021

KVK Hnahthial Demonstration farm chu vawiin khan Hnahthial District Bawrhsap Pu Vanlalmawia chuan tlawhin an hmalakna hrang hrang a enfiah a, bawlhhlawh sawngbawl dan turte a sawipui nghal bawk.

Hnahthial District Bawrhsap Pu Vanlalmawia chuan "ram hmasawn zelah mipui pawh kan pung a, bawlhhlawh pawh kan ngah telh telh a ni. Heng bawlhhlawh thenkhatte hi sawngbawl chuan tangkai taka siam leh theih a nih avangin chutiang tura ngaihtuahna senga kan buaipui hi thil pawimawh tak a ni" tiin "Hnahthial pawh District Headquarters a nih avangin mihring kan pung zel ang a, bawlhhlawh te pawh mangan pui tham a thlen hun te pawh ala awm thei a. Chumi avang chuan tun atanga bawlhhlawh sawngbawl dan te kan hriata kan inzirtir hi a tul takzet a, KVK Hnahthial-in chutiang lama mithiam kan neite hi a lawmawmin an thiamna te kan chhawr tangkai a tul hle a ni" a ti bawk.

KVK Hnahthial-in Changpat hmanga leitha an siam (Vermicomposting) an kalpui mekte chu enfiahin Hnahthial khawchhunga bawlhhlawh tawih thei (Wet) te chu mumal taka sawngbawl dan turte an sawiho nghal bawk a ni.

Hei bakah hian Hnahthial district bawrhsap Pu Vanlalmawia hian KVK-in Kut hnathawktu ten hlawk zawka thlai an thar theih dan tur ngaihtuaha thlai chi hrang hrang - dragon fruit, Azolla, Lakhhuih an chinna hmun leh Ar an vulh leh keu tirna hmunte a tlawh nghal a, Pi PC.Zonuntluangi SDO (Sadar) leh Pu H.Lalramliana Election Officer & BDO te chuan an tawiawm bawk a ni