No.5527/2020-2021

Hnahthial District Bawrhsap Pu Vanlalmawia chuan vawiin khan a Office Chamber-ah Hnahthial-a MJA member-te kawmin Hnahthial District hmasawn chhoh zelna turin Sorkar hnathawk te, Khawtlang hruaitute, Civil Society te, Media leh mipuite chu tang tlanga thawk ho zel turin a sawm a ni.

Hnahthial District tih changtlun nan Sorkar chuan chak takin ruahmanna a kalpui zel thu District Bawrhsap Pu Vanlalmawia chuan sawiin “Kan District mamawh hrang hrangte chu kan sorkar hotu ten min ngaihtuahpui reng a,kan lawm hle a ni” tiin Hnahthial District tih changtlun nan Kum 2019-2020 khan Budget Estimates ah cheng Nuai 150.00 leh Additional Fund Cheng Nuai 42.22 pek an nih thu leh Kumin 2020-2021 hian Cheng Nuai 330.40 pek an nih bakah mamawh hrang hrang atan Cheng Nuai 5 pek belh an nih tawh thu a sawi bakah mamawh dan a zirin dil belh zel tur a nih thu a sawi bawk

Hnahthial District chu Lunglei District nen Staff insem tur ang ang te GAD ruahmanna hnuaiah tihfel tura kalpui mek a nih thu pawh sawiin Hnahthial District Bawrhsap chuan Post ruak 12 (LDC-4, Driver-1, Despatch Rider-1, Group D-6) te pawh hnawh khat turin hmalakna kalpui mek a nih thu a sawi a, Group D hnalak turte hi naktuk atangin interview neih a ni dawn a ni.

Hnathawhna atana mamawh Motor, Furniture leh Equipments hrang hrang te pawh ngaihtuah chhoh mek zel a nih thu Pu Vanlalmawia chuan sawiin tunah dinhmunah Lirthei 4- Verna (1), Bolero (2), Bike (1). an nei mek thu leh Motor mamawh dang pawh neih belh zel tura hmalak mek a ni, a ti.

District Office hrang hrang te hawn chhoh zel a nih thu pawh tarlangin Hnahthial Agriculture Sub-Division chu District Office ah hlan kai a ni tawh a, District Treasury Office atana luah tur pawh Accounts & Treasuries lamin an tifel tawh a, Agriculture Department hnuai Institute pawimawh tak, ITC Hnahthial chu School of Agriculture Sciences (SAS) ah upgrade in, Diploma Course zir theihna tura tih a ni a. DUDO Hnahthial atan Post creation te tihfel tawh a ni a. Tunah hian SDO (Sadar) chu DUDO atana dah phawt a ni. District Revenue Office (Settlement Officer) SDO (Sadar) chu Settlement Officer, Hnahthial District atana designate fel a ni tawh bakah Sports & Youth Services hna bultan turin Election Officer chu District Sports & Youth Services Officer atan designate fel a ni tawh thu a tarlang a, Hnahthial District-ah Aadhaar Enrollment pawh thlaleh October Ni 1 atangin kalpui tum a nih thu a sawi bawk a ni.

MJA member-te chuan Hnahthial District hmasawnna tura Sorkar hmalakna leh hnathawh hrang hrangte chu lawmawm an tih thu an sawi bakah District bawrhsap-in MJA te a ngaih pawimawhna a ti lang thin chu lawmthu hrilhin District tih hmasawnna kawngah theihtawpa thawhho pui zel an inhuam thu an sawi bawk a ni.