4274/2024-2025

Dated Hnahthial, the 17th February, 2025: Vawiin chawhma dar 11:00 khan DC Meeting Hall, Hnahthial-ah Hnahthial District Agricultural Marketing Committee (DAMC) hnuaia Secondary Collection Centre (SCC) panga (5)-a Manager leh Accountant te pualin Sensitization Training buatsaih a ni a. Pu Zothanmawia Khiangte, Addl. DC chuan he hun hi kaihruaiin Mizoram Agricultural Marketing Board (MAMB) Coordinator Dr. Malsawmdawngliana chuan SCC inrelbawl dan leh tul dangte chipchiar takin a zirtir a ni.

Training kaihruaitu, Hnahthial Addl. DC, Pu Zothanmawia Khiangte chuan February ni 20-ah sorkar chuan kuthnathawktute thlai thar chhuah Sawhthing a lei tan tur thu a sawi a. Tun tuma lei dan tur hi state dang atanga leitu ten an duh zat an lei a, pawisa an inhlan tawp ang khan a rem tawh loh thu a sawi a. Voucher te tha tak leh felfai taka vawn a ngaih tur thu sawiin sawhthing hralhtute bank account-ah ni 7 chhungin an sawhthing man chu thun nghal zel tur a ni a ti a. Hetiang a nih dawn avang hian pawisa ziahfel neuh neuh tur a awm tur thu sawiin training pawh uluk taka neih a, an hriat thiam lohte inthlahrung lova zawt hreh lo turin kalkhawmte a chah a ni.

Mizoram Agricultural Marketing Board (MAMB) Coordinator, Dr.Malsawmdawngliana chuan sorkar-in sawhthing chu a tiam ang ngeiin a lei ngei tur thu a sawi a. A bul tanna atan tun thla ni 20-ah a lei tan dawn a ni tiin hemi atang hian thil kalphung tha zawk a chhuah ngei pawh an beisei thu a sawi a. Tun SCC hi tha tak leh dik taka an kalpui theih a, a kalphung in duhthu a sam chuan sawhthing chauh ni lo, thlai thar chi hrang hrang hralhna atana thil tangkai tak tur a ni dawn a ni a ti bawk. SCC inrelbawl dan leh tul dangte chu SCC Manager leh Accountant te hnenah chipchiar takin zirtirna a pe nghal a ni.

Hnahthial District-ah hian Secondary Collection Centre panga (5) - Chhipphir, Hnahthial, Tarpho, Darzo leh Cherhlun ah te awm a. Data an lakkhawm atanga a lan danin tun dinhmunah Hnahthial District chhungah sawhthing hi quintal sing hnih chuang hralh theih tura an thar beisei a ni.