1593/2024-2025

Dated Hnahthial, the 14th August, 2024: Vawiin khan Hnahthial School Education Department leh Samagra Shiksha tangkawp hnuaia District Campaign Committee buatsaih, District Education Reforms Campaign chu Mizoramah a vawi khan nan Hnahthial District-ah hman a ni a. He hunah hian School Education Minister, Dr. Vanlalthlana chuan khuallian ni a hmanpuiin Hnahthial bialtu MLA Pu Jeje Lalpekhlua chu khual zahawm a ni.

He hunah hian khuallian Dr. Vanlalthlana chuan Education reforms campaign a vawi khat nan Hnahthialah hman theih a ni chu lawmawm a tih thu sawiin he hun thlen theih nana hma latu zawng zawngte hnenah lawmthu a sawi a. Minister chuan Mizorama zirna siamthat nana he an hmalakna pawimawh tak hnuaia tih tur hmachhawp hrang hrangte chu sawiin tun hnaiah zirna in siamthat nan theihtawp a hma an lak mek thu a sawi a.

Zirlaiten zirna khaihlak lohva an zir theih nan school zawng zawng hnenah lehkhabu chu a a rang thei ang bera sem an tum thu te, class 3,5 leh 8 a random examination kalpui a nih dan tur te leh zirna ina hun vawn dik a nih theih nana technology hman tangkai a nih theih dan turte a sawi a.

Hei bakah hian zirna in in a mamawh, zirlai lehkhabu mai ni lo, infiamna hmanrua tih changtlun tuma hmalakna kalpui mek a nih thu te sawiin chu chang ni lo, zirlai naupangte chhiar tur, zirtirna hrang hrang nei mai bakah kan hnam zia rang pholang thei tur comics bu te siam tum a ruahmanna a awm mek thu te a sawi. 

School Education Minister chuan zirtirtute chu school hrang hrangah indaihzai zawka insem rualrem a nih theih nan Rationalization kalpui tum mek anih thu sawiin transfer and posting pawh mumal zawka kalpui tum a nih thu a sawi bawk.

Minister chuan Information technology pawimawh zia sawiin IT hmanga zirna in siamthat an tum thu a sawi a. Tunlai khawvelah chuan technology hian kan nun engkimah min hual vek tawh avangin zirlaite hmasawnnan zirtirtu pungkhawmte chuan a tha zawnga an zirlaite hmanpui turin a sawm a. Zirlaite chu top priority an nih thu sawiin chuvang chuan zirtirtu chu an zirlaite rilru sukthlek mila zirtir thei turin tunlai khawvel changkanna mil zela inzir thar zel turin a chah ngah bawk a ni.

School Education Minister chuan kan ram siamthat dawn chuan zirna atanga kan tan a tul thu sawiin hemi anih vang tak hian zirtirtu tinte chu zirna siamthat nan tan la hova, tanrualpui turin a sawm a ni.

Minister hian thusawina a neih zawh hian he huna pungkhawm school hrang hrang zirtirtute hnen atang zawhna leh chhanna hun a hmang a ni. 

Khual zahawm Pu Jeje Lalpekhlua pawn he hunah hian thu sawiin Mizoram District zingah a hmasa ber atan Hnahthialah Education Reforms Campaign neih a ni chu lawmawm a tih thu a sawi a. He hun hian hmasawnna a thlen ngei theih a beisei thu sawiin Hnahthial District chu zirna lamah tan an lak a tul thu a sawi a. Zirtirtute hnenah thu chahin an hna chu eizawn nan chauhva hmang lo tura a duh thu sawiin zirlaite hmakhaw hun hriltu an nih avangin zirtirna hi lak thutak a tul thu a sawi a. Zirlaiten kawng engkimah thiamna an chherchhuah theih nan zirna piah lamah co-curricular activities nasa zawka kalpui turin zirtirtute chu sawmin zirtirtute chu khawtlanga mi rawn kai an nih avangin entawntlak taka a nitin nun hmang theuh turin a chah nghal bawk a ni.

He hunah hian Mizoram Education Reforms Committee (MERC) Working Chairman, Prof. Lalbiakdiki Hnamte chuan workshop kaihhruaiin School Education consultant Rev. Dr. Thanzauva leh Hnahthial Bawrhsap Pi Rita Lalnunmawii Pachuau chuan thusawina hun a nei bawk a ni.

Education Reforms Campaign hmanna hun neihah hian Hnahthial Govt. Southern High School Pipe band Academy hawnna hun khuallian chuan nei nghalin Teacher Resource Package - Tablet chu school hrang hrang hnenah a sem nghal a ni.