No.3886/2021-2022
Aizawl the 3rd February 2022 : Vawiin chawhma dar 11:00 khan DC Conference Hall Hnahthial-ah Hnahthial District Level Fire Prevention Committee chua an Chairman Pi Saizikpuii, Additional Deputy Commissioner hovin an thu khawm a, Kumin Fire Prevention Week thupui "Kangmei Ven hi mitin mawphurhna a ni" tih hmangin February ni 7-ah Fire Prevention Week hawnna hun hman nise an ti.

Meeting-ah hian February ni 7 atanga ni 12 chhunga hman tur Fire Prevention Week hman chungchang ngaihtuah a ni a, Fire Prevention Week hawnna hun February ni 7 chawhma dar 11:00-ah Govt. Hnahthial College-ah hman nise, hetah hian Pu R. Lalremsanga, District Bawrhsap chu khuallian atan ruat a ni. State Level Sub-Committee on Fire Prevention in lo, leipui leh huan hal hun atan a ruat March ni 15 chu Hnahthial District-ah pawh hman ve ni se, March ni 15 hnu lama lo, leipui leh huan hal an awm chuan a na thei ang bera hrem nise, hemi chungchangah hian Magistrate lamin order chhuah se tih a ni a, Daily newspaper-ah a tam thei ang ber kangmei laka fimkhur chungchang ziak tura editor te ngen nise, Head of Institution ten zirlai te hnenah a theih ang tam kangmei laka fimkhur a tul zia zirlai naupangte hnenah sawi tura ngen nise, Hnahthial District chhunga VC tin hnenah Kangmei laka fimkhur a tul zia inzirtirna a tam thei ang ber puangzar tura ngen nise tih te, Hnahthial District chhunga Kohhran hrang hranga chhiar chhuah turin District Level Fire Prevention Committee hmingin Kangmei laka fimkhur tul na thawn nise meeting chuan a ti bawk.

Hnahthial District chhunga khaw hrang hrangte kangmei ven kawnga hma la tha endik turin Pi Jennifer Vanlalhruaii Pachuau, SDC kaihhruai Sub Committee din a nih bakah Kangmei ven chungchangah High School Level Essay Writing Competition neih nise tiin Committee chuan a mawhphur turte a ruat fel nghal a ni. Hnahthial District Bawrhsap Pu R. Lalremsanga chu hri avanga inkhung hrang lai a ni a, meeting-ah hian tel thei lo mahse biak hmuhtheihna kaltlangin a chhim a ni.