No.846/2020-2021

Hnahthial District Task Force on Covid 19 chu vawiin khan an Chairman leh District Bawrhsap ni bawk Pu Vanlalmawia kaihhruaiin DC Conference Hall ah Village Level Task Force hruaitute nen an thukhawm a, inkharkhip thawh hnihna neih zawh taka hmalakna hrang hrang thlir letin thawh thumna kalpui leh meka hmalak chhunzawm zel dan tur an sawi ho bawk

Meeting kaihruaitu District Bawrhsap Pu Vanlalmawia chuan Covid 19 hrileng darh zel tur venna kawnga hmalakna kal tawh zawng zawngah hmalatute hnenah lawmthu sawiin"Inkharkhip thawh thumna kan kalpui leh mekah hian VLTF te in hah hle ang tih ka ring a, mahse tu tan bik maha thawk in ni lova kan za vaia him tlanna tura thawktu innih avangin theihtawp inchhuah zel ka beisei a, sorkar ruahmanna hrang hrang District Level atanga kan rawn tih chhuahte pawh tha taka lo bawhzui zel turin ka ngen tak meuh che u a ni" tiin Inkharkhip thawh thumna ah hian mihring han chetvel hi a hma aiin phalzau deuhin lang mahse kan tih tur leh tih loh turte a chiang hle thung a, duty te pawh kan insiamrem a ngai hle a, Social distancing leh Mask vuah te erawh ngaihpawimawh zual a nih thu a sawi bawk a ni.

Meeting chuan Hnahthial khawpui chhunga dawr te chu nitin a inchhawkin hawn nisela Passenger phur lirthei te pawh sorkar ruahman angin an phurh theih zatve phur tura tih chu tha ti tlangin Auto rickshaw bikah passenger pakhat bak phurh phal loh nise an ti. Private motor Khawchhung tlan turte pawh sorkar ruahman angin Even leh Odd Number angin nitin intlan chhawk se, khauh takin kenkawh zui nise an ti bawk

Hnahthial District chhunga Myanmar nena inkalpawhna a duty te hnena tanpuina petu Zoram hmun hrang hrang a mite hnenah DLTF Hnahthial chuan lawmawm an tih thu meetingah hian tarlan niin Joint YMA Hnahthial leh Tuipui D VLTF te pawhin tanpuina pekchhuah leh an tum tih tarlan a ni bawk. Hnahthial district chhung Border a duty te hian rualtlanga thilpek an dawn theih nan tanpuina pe turte chuan Nodal Officer Pu H.Lalramliana, EO & BDO hnenah hrilhhre hmasa thin se an duh thu an sawi bawk a ni.

Meeting ah hian Dr.R.Lalsanglura MO chuan report pein tun dinhmunah State pawna tangkhang Manipur atangin mi 9 leh Meghalaya atang mi 4 te chu KVK Farmer's Hostel, Hnahthialah quarantine mek an nih thu sawiin an hrselna dinhmun a thain RAT hmanga test an neihah pawh an Negative vek thu a tarlang.