No.1226/2021-2022

Hnahthial the 2nd July 2021 - Covid-19 hrileng laka mipuite himna tura inkhuahkhirh kalpui mekah Hnahthial District Task Force leh VLTF te chu an Chairman leh District Bawrhsap ni bawk Pu H.Dolianbuaia kaihhruaiin a Office Conference Hall-ah vawiin khan an thukhawm a, Sorkar hnathawkte chu Covid-19 duty atana an ruat Ni tih lohah chuan Pisa kai vek turin an ti.

Meeting kaihruaitu District Bawrhsap chuan hri dona kawngah theihtawp chhuaha hmalak reng a tul thu sawiin "Kan district ah hian hmasawnna hnathawh hrang hrang a kal chho mek a, heng hnathawktute pawh hian inkaihhruaina an zawm tur a ni a, Covid -19 laka mipuite himna tura inkaihhruaina siam chu mitinten an zawm tur a ni" tiin khauh takin inkaihhruaina te chu kenkawh chhunzawm zel a nih tur thu a sawi bawk a ni

Meeting-ah hian DLTF Member Secretary Dr.Lalrengpuii Ralte, Medical Nodal Officer Dr.R.Lalsanglura leh Dr.Zosangliani te report atanga a lan danin Hnahthial District-ah hian Covid-19 hri kai leh kai loh endik mi 4093 awm tawhin heng zinga mi 92 te chu naupang 9 telin an positive tih hmuh chhuah niin 2 te hi vawiina hmuh chhuah an ni nghe nghe a ni. Mi 35 enkawl dam ni tawhin mi 55 chu CCC Hnahthial-ah enkawl mek an ni a, mi dang 2 te chu ZMC-ah phurh phei an ni.

Covid-19 hri danna (Vaccine) Full dose pek tawh hi Hnahthial District-ah mi 957 awm tawhin chungte chu Health Care Workers - 179, Frontline Workers - 241 leh kum 60 chunglam - 537 te an ni. Dose khatna pek tawh hi mi 6041 an awm bawk a, chungte chu kum 45 chunglam 2458 leh kum 18 - 44 inkat mi 3583 te an ni.

Hnahthial District-ah hian Covid Care Centre (3C) atan KVK Framer's Hostel, Gov't Southern High School leh Community Nusing Traning Centre te hman mek an ni a, Dedicated Covid Health Centre (DCHC) atana ruahman Boy's Hostel, Govt Hnahthial College chu Community Covid Care Centre (4C) atan hman ni zawk se, DCHC atan hian BCM Lungleng Sunday School Hall nise tih a ni a, 4C tur dangte pawh ruahman mek a nih thu tarlan a ni bawk

Meeting-ah hian Sorkar-in inkaihhruaina a siamte thlir ho niin Hnahthial District chhunga kalpui dan tur sawiho a ni a, infiamna practice chu Indoor-ah zing dar 5:00 atang dar 8:00, tlai lamah dar 3:00 atanga 6:30 nise, Outdoor- ah zing dar 4:00 atang dar 7:00 tlai lamah dar 3:00 atanga 6:00 ni bawk se an ti. Tawngtai inkhawm neih hun hi zing dar 4:00 - 6:00 nise, tlai lamah dar 5:00 - 6:30 ah neih ni bawk se, hemi behchhana Programme dang siam erawh phal loh nise an ti. Hmun dang atanga sumdawng bungrua phurh luh unload hun atan Bazar ni ah zan dar 5:30 atanga zing dar 4:00 inkar nise, Bazar loh ni ah chawhnu dar 1:00 atanga zing dar 4:00 inkar ni bawk se an tih bakah tun dinhmun thlirin hrileng hi darh zel theih a nih avangin Hnahthial District chhunga Maxi cab te chu District chhung bak la Service lo se an ti bawk a ni.