No.2074/2020-2020

Hnahthial District chhunga mimal, Pawl leh Kohhran hrang hrangte chu Covid 19 dona kawngah luangchhuak mek zelin vawiin khan Rotlang East Khawtlang chuan Quarantine centre a awm mekte ei turin an thar chhuah thlai chi hrang hrang thahnem tak an hlan a, BCM Rawpui Kohhran, BCM Lungleng leh YMA Branch Lungleng Hnahthial te pawhin nimin khan tanpuina pawisa fai an hlan bawk a ni.

Heng tanpuina thilpekte hi Hnahthial District Task Force aiawhin an Chairman leh District Bawrhsap ni bawk Pu Vanlalmawia leh Election Officer Pu H.Lalramliana te chuan DC's bungalow ah lo dawngin tanpuina petute chungah lawmthu an sawi a, Covid 19 do kawngah mipuite chu tan ho a pawimawh thu leh tha thlah lova thawh hona tha vawng nung zel turin an chah a ni.

Covid 19 do kawngah a tulna a pianga hman turin BCM Rawpui Kohhran hian Rs.20,000/- (Cheng Sing hnih) an hlan a, BCM Lungleng Kohhran pawhin Rs.10,000 (Cheng Sing khat) hlanin YMA Branch Lungleng, Hnahthial pawhin Rs.5,000/- (Cheng Sang nga) an hlan bawk a ni. Rotlang East khawtlangin chuan chawhmeh thahnem tak hengte - Antam, Maian, Bal, Pelh, Mautuai, Theihai, Anthur, Hmarcha rep, Pelh rah, Sawhthing, Bawkbawn, Phuihnam, Pelh hnah te DLTF hnehah hian an hlan a ni.