No.219/2021-2022

Hnahthial the 21st April, 2021 : Covid-19 hrileng darh zel avanga inkhuahkhirhna kalpui mekah vawiin khan Hnahthial-a VLTF leh DLTF te chu an Chairman leh District Bawrhsap ni bawk Pu H.Dolianbuaia kaihhruaiin DC Conference Hall-ah an thukhawm a, zanin atang hian Hnahthial khawpui chhungah khauh zawkin inkhuahkhirna kalpui tum a ni.

Meeting kaihruaitu District Bawrhsap Pu H.Dolianbuaia chuan tun dinhmunah Hnahthial District-ah Covid-19 positive an awmloh thu sawiin, "kan him zelna tur hian sawrkar thupek te kan zawm that a ngai a, hri kan kai theihna tur nia lang te pawh kan chhut chah zel a tulin thuawih lo te chungah pawh hremna kan lek kawh ngam tur a ni" a ti.

Medical Nodal Officer, Dr.R.Lalsanglura report atanga a lan danin Hnahthial District chhungah mi 2241 te sample endik sak tawh niin chungte chu RAgT-ah mi 803, RT-PCR-ah mi 248 leh Truenat-ah mi 1190 te an ni. Heng zinga mi 23 te chu Covid-19 hri kai tih hmuhchhuah niin enkawl dam an ni tawh thung a ni. Sample endikna tur hmanrua pawh an la ngah tawk thu Dr.R.Lalsanglura chuan a sawi a ni.

Meeting chuan zan dar 8:30 atanga zing dar 4:00 inkar Curfew chu khauh zawka kalpuiin VLTF te chu an mahni area theuhah duty insiam thin se, Police te pawh patrolling nei thin se an ti a. Chhun lamah Sorkar hnathawkte chu Hnahthial khawchhung duty point hrang hrang siamah duty thin bawk se an ti. Sumdawnna dawr inhawn dan tur pawh VLTF ten an area theuhah ruahmanna siam se, Inrinni zing-ah Bazar buiding khar nise, thlai zuar turte inzawrhna tur erawhchu MRB atanga SBI inkar chhungah area VLTF ten Feet 6 danah ruahmanna lo siam se an ti bawk. YMA Sub-Hqrs. Hnahthial inthlan, PYD District Conference leh Pathian thuchah sawi chungchang te pawh ngaihtuah niin Inkhuahkhirh hun chhung Ni 26.4.2021 ral hma chuan phal loh nise tiin Meeting chuan a rel a, Hnahthial District pawn lam atanga mihring rawn lut te chu uluk taka chhinchhiah turin VLTF te chu ngen an ni.