No.2301/2020-2020

Mizoram sorkar ruahmanna angin inkharkhip thawh 7-na Hnahthial District chhunga kalpui dan tur ngaihtuahin vawiin khan District Bawrhsap Pu Vanlalmawia kaihhruaiin DC Conference Hall-ah District level task Force leh Village level Task Force hruaitute chu an thukhawm a, inkaihhruaina tura ruahman siam an thlir ho a ni

Hnahthial District Bawrhsap Pu Vanlalmawia chuan Covid-19 do kawngah Hnahthial District chuan hmalakna a kalpui hma thu leh Awareness campaign pawh an neih that thu sawiin "tun dinhmunah Covid vei awmlohna District kan ni hi a lawmawm takzet a, Covid-19 do kawnga hmalatu te thawhrimna leh mipui ten sorkar thu an awihna rah duhawm tak a nih bakah kan vanneih vang liau liau niin ka hria" tiin inthlahdah chuang lova tha taka sorkar thuchhuak zawm zel turin mipuite a chah bakah mimal, pawl leh Kohhran hrang hrang atanga hmalakna tura tanpuina an dawng thin chu lawmawm a tih thu a sawi bawk

Quarantine Facility chungchang Report petu Dr.R.Lalsanglura Medical Nodal Officer chuan tun dinhmunah Covid-19 avangin State dang atanga Hnahthial District chhunga rawn hawng mi 147 awm tawhin heng zinga mi 88 te chuan Quarantine hun an hmang zo tawh a, mi 59 te chu Quarantine Facility-ah la awm mekin swab sample result nghah mek 2 an la awm tih a tarlang a ni. Security chungchangah pawh mipui ten thu an awih thu leh harsatna a awm loh thu Pu Vanlalbiaka Joute, DSP(Hqrs) chuan a tarlang bawk a ni.

Inkharkhip thawh 7-na neih tura sorkar in inkaihhruaina a siam pawh Election Officer Pu H.Lalramliana kaihhruaiin an zir ho a, mipui ten tha taka an zawm theih nan hmalatu te pawh insang mar zual turin an infuih bawk a ni.