No.2060/2020-2020

Hnahthial Officers' Club (HOC) chuan District Bawrhsap Pu Vanlalmawia leh SP Pu Lalbiakkila te hovin vawiin khan YMA Day 2020 pualin Darzo tlangah Thing tiak chi hrang hrang an phun a, Covid 19 avanga khunghran mekte awmna S.Vanlaiphai Quarantine Centre an tlawh nghal bawk.

He hunah hian HOC President leh District  Bawrhsap ni bawk Pu Vanlalmawia chuan "Ramngaw kan tih chereu nasat avangin sik leh sa inthlak thinte pawh a danglam nasa tawhin khawvel hian chhiatna nasa zawk kan tawk thei reng a ni tih hi hre thar fo ila, chumi laka kan himna turin Thing phun uarin  enkawl zui ila, a awm sate i humhalh ang u" tiin Covid 19 dona kawngah pawh tan la thar zel turin Officer rual kalkhawm te chu a chah a. Hnahthial SP Pu Lalbiakkila leh Medical Officer Dr.R.Lalsanglura te chuan fuihna thu an sawi bawk a ni.

He hunah hian Darzo leh S.Vanlaiphai VLTF te hnenah Silpouline 3 ve ve leh Hand Sanitizer thahnem tak Hnahthial DC chuan a pek bakah Pu Mickey R.Lalenkawla SDEO Hnahthial chuan S.Vanlaiphai Quarantine Centre tan Rs.5000 a hlan bawk a ni.