1553/2024-2025

Dated Hnahthial, the 13th August, 2024: Vawiin khan Hnahthial DC Meeting Hall-ah Hnahthial District Election Officer, Pi Rita Lalnunmawii Pachuau, District Bawrhsap ni bawk chuan Hnahthial South-II huam chhunga Village Council Member pakhat thlan thatna (by-election) neih tura atana Final Electoral Roll chu a tlangzarh.

Bawrsap chuan electoral roll ennawnna mumal tak neih a nih hnuah final electoral roll tlangzarh theih a ni chu lawmawm a tih thu a sawi a. Inthlanna dik leh felfai a awm theih nan electoral roll mumal tak neih a pawimawh thu sawiin tun inthlan lo awm tur hi muanawm leh tha taka neih theih ngei a beisei thu a sawi bawk. 

Hemi zawh hian AERO, Pi Betty Lalrinfeli chuan final electoral roll chungchanga hriat ngai leh tul dang pawimawhte chu a tarlang a ni.

He VC by-election neih tur atana draft electoral roll hi July ni 24,2024 khan lo tlangzarh tawh niin hetah hian vote nei mipa 420 leh hmeichhia 461,a vaiin vote nei 881 an awm a. Hemi draft roll neih hnuah belh leh paih ngaite tih fel anih hnuin final roll hi tlangzarh a ni ta a ni.

Vawiina tlangzarh tak Hnahthial South-II VC By-Election final electoral roll-in a tarlan danin tun dinhmunah hian mipa vote nei 420 leh hmeichhia vote nei 455 an awm a. A vaiin vote nei hi tunah mi 875 an awm a ni.

Tun Hnahthial South-II by-election hi Village Council Member pakhat ban avanga neih tura ruahman niin inthlanna neih ni tur hi tun dinhmunah hriat a la ni lo a ni.