No.7613/2020-2021

Rashtriya Kishor Swasthya Karyakram(RKSK) Programme hnuaiah vawiin khan Govt Higher Secondary School Hnahthial-ah Adolescent Health Day hman niin District Bawrhsap Pu Vanlalmawia chuan khuallian niin a hmanpui a, "Pathianin keimahni theuhah thiamna leh theihna sang tak a dah theuh a, chumi par chhuah tir tur chuan a man kan pek ve a ngaiin kan hun leh tha kan sen a ngai a ni" a ti.

Hnahthial District Bawrhsap Pu Vanlalmawia chuan khawvelah hian resources tam tak a awm thu leh chung zingah chuan Human Resource chu a ropui ber thu sawiin "Resource tam tak chu a nihna ang ngawt chuan a hman theih lova develop a ngai a, chumi tur chuan mihring kan pawimawh a ni. Kan taksa hi Pathianin thil ropui tak tih nan a siam a, chu chu develop a nih loh chuan lei hnuaia rangkachak inphum ang chauh a nih avangin zirna hmang te NGO leh sakhua angte in kan in develop a ngai a ni" tiin Resources hlu ber chu keimahni hi kan nih thu leh Pathian hian Resorces zawng zawng develop thei turin mihring-ah theihna a dah thu a sawi a ni. Khawvelah Chaw thlawn dawn tur a awm loh thu leh thawhchhuah a ngaih thu sawiin Hnahthial District bawrhsap chuan "Eizawnna hi engtikah emaw chuan kan koah a innghat dawn a, kan tih makmawh tur a ni. Hringnun hi mumal taka a kal theihna turin ruahmanna kan neih a ngaiin thil hrang hrangin min chim a, chumi karah chuan tum mumal tak kan neih a tulin, miin a tumna enzawn tlatin a kal chuan kal thlen hun a nei thin a ni" tiin Mihring nuna thlemna tawka kawng diklo zawh chu nunphung nghet lo a nih thu leh thalaite chu hlawhtling tak ni turin nunphung hrisel an neih a ngaih thu a sawi bawk a ni

He hunah hian Superintendent of Police Hnahthial Pu Lalbiakkila pawhin kalkhawmte chu ineternet hmang thiam tur leh Social media-a thu post tur reng reng ngaihtuah chiang hmasa fo turin a chah a, mi hlawhtling ni turin kalna lama tih tak takna nun neih a tul thu sawiin pawh sawiin Hnahthial SP chuan "Kan thil tih turah kan chian a ngai a, thil tih dum hian awmzia a neilo fo. Khawvel hian BA ringawt hi a mamawh tawh lo, engemaw thiam bik neih a ngai a ni" tiin Inchuhna khawvela kan awm tawh thu leh beidawng hma reng reng an hlawhtlin ngai loh a sawiin Mihring hi khawi atanga lo chhuak nge, tih aiin khawi nge a thlen dawn tih chu a pawimawh zawk thu a sawi bawk a ni

Hnahthial DEO Pu Mickey Lalenkawla, Medical Officer Dr. Zosangliani leh Dr. R. Lalsanglura ten thu an sawi bakah Zirlai naupang ten "Ruihhlo, tleirawl leh rawltharte hmelma" tih thupui hmangin Extempore Speech neiin Dr. Vanlalzawma'n lawmthu sawina hun hmangin hun a khar a ni.