339/2022-2023
India zalenna kum 75 tlinna lawmna peng pakhat Bhagidari (People's Participation) atan tukin zingkar khan Hnahthial-ah District bawrhsap Pisa huaihawtin Faina Hnatlangpui (Sanitation Drive) neih a ni a, sawrkar pisa hrang hrangte, Village Councils, YMA Branch, MHIP Branch leh Zirna In hrang hrang hranga Eco Club atangin mi 350 vel an thawkchhuak a ni

Hnahthial-a Faina hnatlangpui neih hi Team pali (4) ah inthenin chhim leh hmar lam hmun 2 ve ve atangin kawngpui dunga bawlhhlawh an chhar fai hlawm a, Bazar kawnah intawk khawmin SDO (Sadar) leh DUDO ni bawk Pu Lalremruata Sailo kaihhruaiin inkhawmtawi neih zui nghal a ni a, District bawrhsap Pu R.Lalremsanga chuan Faina pawimawh zia leh Hnahthial District-in nasa taka tan a lak thu sawiin "tukin a bawlhhlawh chhar faia hnatlang te pawh hian kan hnatlan-ah duh tawk mai lovin nitina kan nunpui a tul a, Motor atanga mezial bung leh thil eina kawr khawlaia paihthlak mai chin te hi sim a tulin Driver te pawhin kan Motor-ah hetiang bawlhhlawh tenau paihna bawm siam nachang kan hriat a tha hle a ni" a ti a, kawng kal mipuite pawhin an thil eina kawr te chu kawng sirah paih mai mai lovin a paihna tur hmun bawlhhlawh bawmah paih zel a tul thu a sawi a, "tute tih tur bikah emaw dah lovin kan za vaia tan kan lak a ngai a ni" a ti.

Hnahthial District-ah Covid-19 case a tlakhniam thu leh 10 hnuailamah te a awm tawh laiin tukin report-ah 41 a ni chho leh tih sawi bawkin Hnahthial District bawrhsap Pu R.Lalremsanga chuan "mipui ten CAB kan zawm that a tul hle tih a lang a, Covid hi ala reh lova, tlemin a tla hniam deuh chauh tih a nimai a, darh leh huk thei a ni" tiin inkhuahkhirhna khauh zawk puan a nih loh nan leh kan him tlanna tur atan tha taka CAB zawm theuh turin kalkhawm te a chah a ni.

He huna hnatlang thawkchhuakte chungah Pu Lalneihthanga Colney, EO chuan lawmthu sawina hun a hmang bawk a ni.