2023/2022-2023
Hnahthial the 22nd September, 2022- Hnahthial District Development Coordination & Monitoring Committee chu an Chairman Pu C. Lalrosanga, MP, Lok Sabha hovin vawiin khan Govt Hnahthial College Auditorium-ah an thukhawm a, October 2021 atanga thla kalta August 2022 chhunga Sorkar laipui sum hmanga hnathawh hrang hrangte an thlir ho.

Hnahthial chu District thar a nih angin mamawh tam tak awm tih a hriat thu leh Sorkarin a ngaihtuah zel a beisei thu Pu C.Lalrosanga MP (LS) chuan sawiin "India sorkar chuan thingtlang khaw kilkhawr ber thlenga tih hmasawn duhin cheng vaibelhchhe telin ruahmanna tha tak tak a siam a, Mizoramah pawh scheme engemawzat kalpui mek a ni" tiin hmansawnna te chu chak tak kalpui a nih theih nan kawngpui tha neih a pawimawh thu a sawi a, Mizoram chhung kawngpui siam hnathawk mektu NHIDCL te chu tha taka hnathawk turin a chah a, kawng laih avanga lirthei thenkhat tana tlan hreawm khuar leh pawng sang deuhte chu siamtha nghal zel turin a ngen bawk a ni.

NHIDCL General Manager SG.Dwivedy chuan Aizawl - Tuipang (380 KM) an thawh thu leh 8 packages-ah then a nih thu tarlangin nakkum 2023-ah zawh an inbeisei thu an sawi a, Covid-19 hrileng avang te, Fur ruahtui tam avang te, an kawng laihna tura Electric hrui leh PHED pipe line seng fel loh thenkhat avang ten hna an thawk chak hlei theilo tih a sawi bakah mimal In compensation la vek tawh la senghawi duh lo te pawh an awm thu a sawi bawk a ni.

He hunah hian Sorkar Department 17 ten Sorkar laipui sum hmanga an hmalakna hrang hrang tarlangin DRDA Hnahthial hnuaiah PMKSY 2.0 atangin Construction work thawh nan Rs.12,09,600 leh South Chawngtui, Khawhri leh Tarpho-ah Horticulture plantation siam nan Rs.11,00,000 hmuh a nih thu tarlan a nih bakah PMAY (G) hnuaiah In 135 sak zawh a nih tawh thu leh In 4 chu la zawh fel loh a nih thu tarlan a ni bawk

MGNREGS hnuaiah Hnahthial RD Block huamchhung atangin Job card nei 6767 awm mekin October 2021 atanga September 2022 kal mekah mipui ten Ni 86 inhlawhna an neih tawh thu leh Material Component hnathawh nan Rs.Nuai 440.53 hmuh a ni tawh tih tarlan a ni. MzSRLM Hnhthial RD Block chuan hmalakna hrang hrang atan Rs.47,25,000 hmu tawhin Village organization (VO) 31 leh SHG 415 an nei mek a ni. BADP sum Rs. Nuai 106 sengin Hnahthial RD Block huamchhungah kum 2021 - 2022 chhung hna chi hrang hrang 8 thawh a ni bawk.

PWD Hnahthial Sub-Division huamchhungah PMGSY sum Rs.32,71,57,592.06 hmangin kawng 37.75 siam a ni a, SPA sum Rs.6,53,06,000 sengin kawng 15.420 KM siam mek a ni bawk.

AH&Vety Deptt Hnahthial atangin National Livestock Mission hnuaiah mi 21 tan Vawk vulh tanpuina Rs.19,250; mi 10 hnenah Vawkpui vulh tanpuina Rs.1,00,000 leh mi 8 hnenah Kel vulh tanpuian Rs.62,700 pekchhuah a nih tawh thu tarlan a nih bakah Department dangte pawhin an hmalakna hrang hrang an tarlang bawk a ni.

He hunah hian Hnahthial District Bawrhsap Pu R.Lalremsanga chuan Hnahthial District din tirh atangin Hnahthial hmunah ngei Chairman hova DISHA meeting vawi khatna an neithei chu lawmawm a tih thu a sawi a ni.