553/2022-2023 

District Level SEDP Committee Hnahthial huaihawtin vawiin khan RD Conference Hnahthial-ah Mizoram Sorkar Flagship Programme SEDP kalpui tur chungchang inhrilhhriatna hun hman niin Hnahthial District chhung khua (Village) hrang hranga SEDP Committee Chairman leh Secretary te an tel a ni

He hun hi Addl DC leh Member Secretary, Hnahthial District SEDP Committee ni bawk Pi Saizikpuii chuan kaihruaiin District Bawrhsap Pu R.Lalremsanga chuan SEDP  chu Flagship Programme a nih angin sorkarin a ngaih pawimawh thu a sawi a, Assembly Constituency pakhatah chhungkaw 1500 zel pek tura ruahman niin mahnia eizawnna bultan nan leh eizawnna kalpui mek ten hma an sawn zel nana tanpui chu SEDP thil tum a nih thu District bawrhsap Pu R.Lalremsanga chuan a sawi a, tanpuina hi chhungkua anga dawn tur a ni a, chhungkaw pakhat atangin beneficiary pakhat chauh a awm thei a, State leh Central sorkar hnuaia hnathawk nghet awmna chhungkua te chu a huam lo thung a ni tiin Department hrang hrang Agriculture, Horticulture, AH& Vety, Fisheries, Sericulture, Land Resources, Soil & Water Conservation, Commerce & Industries, UD &PA leh Tourism Department hnuaiah trade hrang hrang kalpui a nih dawn thu a sawi a ni.

SEDP tanpuina hi Member Secretary, Village / Local Level SEDP committee hnenah Form-1 hmangin dilna theh luh tur a nih thu District bawrhsap chuan sawiin Form-1 hmang hian diltute'n hmalakna (trade) pakhat chauh thlan tur a ni a, pawisa dawn hman dan tur leh pawisa dawnna (transfer-na) tur bank account tar lan ngei tur a nih thu a sawi bakah tanpuina chu a dawngtu turte account-ah thunluh a nih dawn thu a sawi bawk a ni

Tanpuina dawng turte chu tun thla (May 2022) chhungin Village Level Committee in District Committee-ah an thehlut ang a, District Level Committee in an enfel hnuah Ni 15 June 2022 ral hmain State Executive board-ah thehlut lehin July 2022 ral hmain tanpuina sum chu pekchhuah hman tum a nih thu tarlan a ni.

He hunah hian zawhna leh chhanna hun hman a ni bawk.