Vawiin khan Urban Development & Poverty Alleviation Minister Pu Zodintluanga chuan North East Region Capital Cities Development Implementation Program (NERCCDIP) hnuaia Feeder Main - Tuikhuahtlang tuizem lian atanga 7th Day Reservoir leh Luangmual Reservoir chawmtu tur chu Tuikhuahtlang Main Reservoir Complex-ah a hawng a. Asian Development Bank sum hmanga thawh, SIPMIU in a buaipui chu vawiin hian SIPMIU Program Director Er.Valbuanga chuan PHE  Engineer-in-Chief Er.Lalmuanzova hnenah a hlan a ni.

Aizawl West lama veng hrang hranga chengten hnianghnar zawka tui an dawn theih nan UD&PA, SIPMIU leh PHED ten hun engemawchen an lo buaipui tawh Feeder Main hawnna inkhawmah thu sawiin Pu Zodintluanga chuan khawpui chhung, mihring tam tak inbenbel tawhna hmunah pipe phum leh zam bakah tuizem siam hna thawh a ngaih avangin mi tam takin harsatna an tawk a, tunah a hlawkna mipuiin an tel tan thei tur hi a lawmawm hle a ni, a ti. Minister chuan ADB sum hmanga Mizoram Sorkarin hna a thawh mek zingah tui semna, distribution system tihlen leh siam belh hna te; tuizem lian sak belh te; tui tam zawk neih belhna tur atan mai bakah Aizawl khawpui tana tui pump chhuah mek 34.80 MLD aia lian zawk mah 37 MLD Setlaklui chhuah, Sakawrtuichhun lam atanga Tlawng tui lâk belhna turte a tel tiin he project puitlin hunah chuan khawpui chhunga cheng ten nitin tui thianghlim an dawng thei tawh ang, a ti a. Aizawl khawpui chhunga ADB sum hmanga tui semdarh hnathawh mek bakah hian tuichhe lak khawm a thlit fim (Sewerage System) leh khawpui  bawlhhlawh awmze nei zawka lakhkawm leh sawngbawl thatna tur te, tui semna tur Distribution network 363 kms dawn lai phum that leh phum belh te, 37 MLD tui lak belhna tur te, tui dah khawlna tur zem lian veng hrang hrang  hmun 27-ah sak mek te a tel thu Minister chuan a sawi bawk. 

UD&PA leh PHE changtu Minister Pu Zodintluanga chuan tui chhe lakkhawmna sewer line 45 kms siam mekah 20 kms dawn zawh tawh a ni a, tui chhe thlit fimna tur Sewage Treatment Plant pawh Chite lui kamah siam mek niin zawh fel thuai a ni dawn, a ti a. Tuna ADB sum hmanga Project thawh mek hi zawh fel a nih chuan Aizawl khawpui hian ni tinin tui 71.80 Million litres vel hmuh theih beisei a ni a, hei hi kum 2033 thlenga kan tui mamawh zat phuhru tura ruahman a ni, a ti.

Minister-in a hawn tak Feeder Main hi Tuikhuahtlang Main Reservoir atanga chhukin Khatlaah, New Secretariat kaltlangin Tuikual lui a kan a, 7th Day tlang a thleng a. 7th Day Tlang atang hian Luangmual kaltlangin Aizawl tlaklam Government Complex Luangmual te, Rangvamual, Tuivamit, Phunchawng, Central Jail, Tanhril, MZU, Sakawrtuichhun leh PTC Lungverh te pawh a chawm tel dawn a. Tuivamit, Sakawrtuichhun, Phunchawng leh Central Jail-ah te hian tuizem thar leh a chawmna tur pipe nen siam mek a ni a, zawh fel thuai tum a ni. Tui pipe thar atang hi chuan, a hmaa darkar 40 dawn 7th Day Tlanga Tuizem  lian tihkhah nana hun hman thin chu darkar 8-ah a ti tawi tawh dawn a. Pipe hi  kum 2048 thleng Aizawl West lam area-a cheng mihring 44,902 vel a chawm thei dawn a, darkar khat chhunga tui litre nuai 5 pe thei tur a duan a ni. Hetianga ruahman anga kalpui a nih hnuah chuan Aizawl tlak lama awm vengte chuan tun hma aiin tui an dawng tha zawk thei tawh tura beisei a ni.

6.41kms a thui Gravity Feeder Main hi cheng nuai 1010 a zawh fel a ni a. December ni 20, 2014 khan thawk tanin December 14, 2017 ah thawh zawh a ni. Hawnna inkhawm hi UD&PA Secretary Dr.C.Vanlalramsanga chuan a kaihruai a, SIPMIU Director Er.Valbuanga’n technical report pe in SIPMIU Dy.Program Director Er.Netralal Jaisi chuan lawmthu sawiin hun a khar a ni.