Rs.600.96 lacs senga sak Mizorama Hockey Astro Turf  hmasa ber Kawnpui Boys Academy a mi chu vawiin khan Pu Hmingdailova Khiangte, Parliamentary Secretary in a hawng.

Pu Hmingdailova Khiangte chuan infiamna lama thalaite theihna leh tuihalna sorkarin a hria a, hemi atan hian sorkar chuan hmunhma tha a siam a zel a ni a ti. Hockey-ah pawh ram aiawh pha kan chhuah zel nan pawh kan hmunhma tha te hman tangkai a nih a beisei thu a sawi.

Hockey Astro Turf tha tak an neih theihna atana Kawnpui khaw mipuite inpekna chu lawmawm takzet a tih thu a sawi bawk. Hockey Astro Turf, Kawnpui phahna tur atan hian Ministry of Youth Affairs & Sports Infrastructure Scheme (USIS) atangin Rs.500 lacs hmuh anih bakah, Special Plan Assistance (SPA) atangin Rs.100.96 lacs hmuh a ni bawk. Hna hi Inderjit Mehta Construction Pvt.Ltd., New Delhi in an thawk a, Polytan Company, Germany atangin hmanrua lak a ni. Astro Turf phah nan hian Rs.420lacs hman niin, retaining wall,fencing, RCC Water Tanky siam nan Rs.180.96 lacs hman a ni. Hockey Astro Turf zau zawng hi a dung 98mts leh a zau zawng 61mts a ni.

He Hockey Astro Turf siam nan hian Kawnpui khawtlang mipuiten thahnemngai takin sorkar an tanpui a, Thlan 35 zet leh chenna In pahnih sawnchhuah a ni.

Hockey Astro Turf hawnna ah hian Sports & Youth Services, Govt.of Mizoram hotute, Mizoram State Sports Council, Kolasib district Officer te, Hockey Association Mizoram bakah Kawnpui mipui te an tel a ni.