Vawiin chawhnu khan Home Minister Pu R.Lalzirliana chuan ama Office ah Pu Lallawmzuala,Tuahzawl khua, India Sipai a tanglai, Jammu & Kashmir a Jash-e-Mohamed leh Hijamudin hel pawl hlawhtling taka beihna avanga huaisen lawmman, SC(Shaurya Chakra) dawngtu chu kawm in lawmpuina tangkafai Rs.5 lakh leh chawimawina thuziak Mizoram aiawhin a hlan a. Lawmpuina pual inkhawm tawi buatsaih ah hian UD&PA Minister Pu Zodintluanga, Social Welfare Minister Pu. P.C. Lalthanliana leh Parliamentary Secretary Lt.Col.(Rtd) Z.S.Zuala te an tel a. Pu. Lallawmzuala hi Col.(Rtd.) Lalchungnunga Sailo, Lt.Col.(Rtd) John Zama leh Ex-servicemen hruaitute bakah ama chhungte leh Sainik hotuten an tawiawm a ni.

Pu Lallawmzuala SC, No.15223301M hi GNR(Gunner)/DMT(Driver Mechanical Transport) rank ni mekin 99 Field Regiment, Artillery, 18 Rashtriya Rifles(J&K) ah a awm mek a. July 23, 2013 khan Lasker-e-Toiba, Jash-e-Mohamed leh Hijamudin hel pawl Commander, hmun pakhatah a biru tih report an dawn bawhzuiin 'Operation Garbar' neih a ni a. He Operation a kalchhuak sipai 12 zingah Pu Lallawmzuala pawh hi a tel a. A thiante beidawn hnuah amah chauhvin hel tawmna nia hriat hi a luhchilh in hel Commander hi a chang chhuak a. Hun engemaw ti chhung an inkah hnuah amah pawhin a ke ah hliam tuar ve hnu in Hel pawl hruaitupa hi a kaphlum ta a ni. A huaisenna leh remhriatnate avang hian India President Pu Pranab Mukherjee hnen atangin huaisen chawimawina sang tak, Peacetime Gallantry Award, Shaurya Chakra, a dawng ta a ni. Shaurya Chakra hi sawrkarin indo a puan hun chhunga sipai huaisen chawimawina sang Vir Chakra tluk a ni. He lawmman a dawn avang hian Pu Lallawmzuala SC hian pension hnu thleng pawhin a thlatin hlawh lak turah a Rs.2,000/- a lak belh ziah dawn a ni. Lallawmzuala SC chuan an inbeih dan chanchin a sawina ah hel hotupa hre chiang tur hian thla tam tak hel pawl te chet tlatna hmunah te khawtual mi angin beram vengtu ah te a tan tawh thu leh an inkah hun lai ai mahin chung hunte chu a hlauhawm thin zawk thu te a sawi a. Hel Commander a kahhlum tak hi India sawrkar in Most Wanted Terrorist a tih zinga mi, terrorist-ten November 26,2008 a Mumbai an beihna a ruahmanna lo siamtu zinga mi niin a lu man ah pawh Rs.125 lakhs lai dah a ni. Lallawmzual SC chuan Kashmir a hel te hi khawtual miin an thlawp that thin em avanga beih a harsat thu a sawi a. A kahhlumna hi Garbar khua a Chhungkaw pakhat in bula Ar In kopang rinchhan a sak chhunga puk siam leh chhawn ah a ni a. Hel Commander leh a thianpa te hi he ar in neitute inchhung leh chhekin ah te Lallawmzuala SC hian a zawng hmasa phawt a, a beidawn hnuah ar in ah hian lut leh in silai a rawn puak nghal a. Tanhmun siam rem inhel hotupa hi vawi engmawzat silaimu a len hnuah a kap hlum ta a ni.

Lawmpuina thilpek hlantu Home Minister chuan ram leh hnam chhan nana nunna thapa misual luhchhuah ngam sipai huaisen, Mizo tlangval an awm leh ta hi Mizo mipuiten an thinlung takin an chhuang tak meuh a ni a ti a. Pu Lallawmzuala SC chu a inpekna leh huaisenna ah Mizote hming a that thu leh tlangval entawn tlak a nih thu HomeMinister chuan a hrilh a ni. Thusawitu dang Lt.Col.(Rtd) Z.S. Zuala, Parliamentary Secretary pawn Mizo tlangval in India sipai huaisen lawmman a hmu chu a ropui takzet thu a sawi a.Lallawmzuala SC chu a hmalam hun ah pawh inngaitlawmna nen fimkhur taka a hnathawh a chhunzawm zel a ngai a ni a ti a. Chawimawina chu chapona leh inthlahdahna ten a zui chhunzawm thin avangin fimkhur a ngaia, nunphung pawh ulawk sawt a ngai a ni a ti.