No.2866/2020-2020    

Lawngtlai, Vawkhniahzawn thla ni 8, 2020: Mizoram sawrkara Home Department leh Disaster Management & Rehabilitation Department Secretary Pi Lalbiaksangi chuan vawiin khan Lawngtlai tlawhin, District Emergency Operation Centre (DEOC) dinhmun a enfiah bakah, District thuneitute leh District Jail thuneitute nen inkawm hona hun an hmang.

Home Secretary hi Lawngtlai Bawrhsap Dr Andrew H. Vanlaldika, MCS leh mi pawimawh dangte'n an lo dawngsawng a. Bawrhsap pisaah Home leh DM&R hnuaia Lawngtlai District-a hma lakna tur hrang hrangte an sawi ho va. COVID-19 hri leng mek dona kawnga DLTF hna thawh dan leh Lawngtlai District dinhmun te an sawi ho bawk.

DM&R Secretary hian Lawngtlai DEOC tlawhin, rikrum thila hman tur hmanraw hrang hrangte a enfiah a. District thuneitute chuan a hnenah hian DEOC mamawhte an lo thlen nghal a ni.

Home Secretary hian Lawngtlai District Jail tlawh a tum chu Lawngtlai daia kawngpui zauh hna thawh mekah ruah sur vanga lei tawlhin kawng a hnawh avangin a tlawh thei ta lo va. District Jail thuneitute nen Bawrhsap pisaah inkawmin, Superintendent of Jail Pu HC Lallianvuta chuan District Jail dinhmun leh an mamawhte a hnenah hian a thlen a. Home Secretary chuan a theih anga an mamawhte ngaihtuahsak a tum tur thu lo hrilhin, jail tangte chawhmeh lei nan Jail Superintendent kutah pawisa fai a hlan bawk.