No.2894/2020-2020

Mizoram sawrkara Home Department leh Disaster Management & Rehabilitation Department Secretary Pi Lalbiaksangi chuan vawiin khan Lunglei tlawhin, District Emergency Operation Centre (DEOC) dinhmun a enfiah bakah, District thuneitute leh District Jail thuneitute nen inkawmhona hun an hmang.

Home Secretary hi Lunglei Bawrhsap Pu V.Lalsangliana leh mi pawimawh dangte'n an lo dawngsawng a. Lunglei DC Conference Hall-ah Department hrang hrang aiawhte nen inkawmhona hun hmangin Home leh DM&R hnuaia Lunglei District-a hma lakna tur hrang hrangte an sawi ho va. COVID-19 hri leng mek dona kawnga DLTF hna thawh dan leh Lunglei District dinhmun te an sawi ho bawk.

DM&R Secretary hian Lunglei District Emergency Operation Centre (DEOC) tlawhin, rikrum thila hman tur hmanraw hrang hrangte a enfiah a. District thuneitute chuan a hnenah hian DEOC mamawhte an lo thlen nghal a ni.

Home Secretary hian Lunglei District Jail tlawhin District Jail thuneitute hian District Jail dinhmun leh an mamawhte a hnenah hian a thlen a. Home Secretary chuan a theih anga an mamawhte ngaihtuahsak a tum thu a sawi.