Vawiin khan Home Minister Pu R. Lalzirliana hovin a pisa ah CYMA General Conference, October ni 17-19, 2017 chhunga Champhai Zotlang a neih tur thlir lawkin NH-6, Seling leh Champhai inkar kawng chhe bik zual lai chu siamthat vat a nih theih nan hmalak dan tur ngaihtuahho a ni.
Meeting-ah hian kawng chhelai siamtha tura lung mamawh zat a tam dawn em avangin Keifang Quarry (BRO Quarry hlui) chu hman tawh loh ni mahse mamawhna a san em avangin Aizawl DC, Geology and Mining Department leh PWD-te enpuina hnuaiah he quarry atang hian lung hi lak mai ni se ti a rel a ni a; Keifang quarry bakah hian private quarry pali atangin lung mamawhte lak a tul dawn bawk a ni.
Kawng siamthat hna chak zawka thawh a nih theih nan lirthei, a bik takin motor lian ke ruk aia tam nei chin te Seling-Champhai inkarah One-Way traffic a hnuaia tarlan ang hin inkarthlak a tlan tir ni se tia rel a ni bawk:
Monday – Aizawl – Champhai
Tuesday – Champhai – Aizawl
Wednesday – Aizawl – Champhai
Thursday – Champhai – Aizawl
Friday – Aizawl – Champhai
Saturday – Champhai – Aizawl
Sunday – Aizawl – Champhai
Seling-Champhai inkar NH-6 kawng dinhmun hi a that loh em avangin leh chhiatna lian zawk a thlen loh nan passenger leh chakkhai phur tih loh lirthei lian chi (ke ruk aia tam nei) te chu tlan khap rih ni se tiin meeting hian a rel bawk a ni.
Meeting-ah hian Police, PWD, Deputy Commissioner, Geology & Mining, GAD atangin department hotute leh CYMA aiawhte an tel a ni.
