Vawiin khan Home Minister Pu R. Lalzirliana hovin a Office Chamber-ah kum 2017-2018 Krismas leh Kumthar vuakvet laia halpuah leh silai lem a mu kapchhuak thei (a kah na) chi lakluh, zawrh leh hman khap chungchang rel a ni. He meeting-ah hian Mizoram DGP Pu Thianghliam Pachuau bakah Home Department official-te, Fire & Emergency Services official-te, District tin DC leh SP, Aizawl Municipal Corporation, Taxation Department official-te leh CYMA hruaitute an tel a ni.
Meeting chuan halpuah leh silai lem a mu kapchhuak thei (a kah na) chi lakluh, zawrh leh hman reng reng khap leh ni se tiin hmalak dan tur a hnuaia mi ang hian a rel :
- DC tinin khapna thupek a rang thei ang berin chhuah se.
- Checkgate zawng zawngin Mizoram chhunga bungraw lakluh te lo endik thin ni se.
- Local Council leh VC tinin tlangauin khapna thu puang se.
- Mizoram chhunga NGO zawng zawngte District tin SP nena tangrualin thahnemngai takin hma lo la se.
- Mizoram Kohhran Hruaitu Committee pawh halpuah hal thatlohzia leh hal lo tura ngenna Kohhran tina puang turin ngen ni se.
- Zirna in tinah uar taka halpuah hal thatlohzia inzirtir ni se.
