409/2023-2024

Aizawl, 11th May, 2023 : Home Minister Pu lalchamliana hovin sawrkar hotu pawimawh ten Manipur buai vanga Mizoram mi leh sa Imphal leh a chhehvela tangkhang te Mizoram sawrkarin a lak chhuah dan vawiin khan SAD Conference Hall, MINECO-ah thlirho a ni a. He hunah hian Chief Secretary Dr Renu Sharma, DGP Pu Devesh Chandra Srivastva bakah Home Department, Supply Department, Finance department, DM&R department, H&FW Department, Transport Department, GAD, Mizoram Police Headquarters leh I&PR Department hotute an tel a ni.

Meeting kaihruaitu Pu Lalchamliana chuan Manipur buaina avanga Mizoram mi leh sa tangkhang hriat theih chin chu lak chhuah vek an nih tawh thu sawiin hemi atana hmalatu Chief Minister, Chief Secretary, DGP, Home department official te leh department hrang hrang ami thawihtawp chhuahtu zawng zawng te, YMA, tlawmngai pawl zawng zawng te leh zirlai pawl te chungah lawmthu a sawi a, mipuiten tha taka an thlawp tlatna ah lawmthu a sawi a, chanchinbumi ten thuchhuah puitling tak nen thu dik leh belhchian dawl chauh an chhuah thin avangin lawmthu a sawi bawk a ni.

Home Commissioner Pu H. Lalengmawia’n report pe in Manipur buaina chhuah tirh May ni 3, 2023 tanga Mizoram sawrkar hmalak dan chi hrang hrang a tarlang a, May ni 7 leh ni 8 khan a belhkhawmin mi 168 lak chhuah an ni a, May ni 9 khan mi 88 lak chhuah leh niin May ni 10 (nimin) khan mi 6 lak chhuah leh an ni bawk a, Imphal atanga hruai chhuah zawng zawng hi mi 262 an ni. Lak chhuahte zingah hian zirlai an tam ber a, hna thil vanga training leh damdawi ina inentir, admit lai mekte bakah tul thil zin te an awm bawk a ni. A tira lak chhuah ngai in report mi 43, sawrkarin thlawhtheihna ticket a lak sak tawh, anmahni remchan zawkna vanga ticket lo la ve an awm a, ticket hi refund theih a nih loh vangin sawrkarin a chawi thlawn tih tarlan a ni.

Meetingah hian Arunachal Pradesh in Mizoram sawrkar puihna a rawn ngen angin an state mi leh sa zirlai naupang 4 Churachandpur-a tangkhang te Mizoram kaltlangin lak chhuak sak an nih thu leh vawiin khan him dam takin Itanagar an thleng tih tarlan a ni.

Vawiin chawhma dar 11:30 thleng khan sahimna zawnga rawn lut raltlan 4061 (Aizawl – 1312, Champhai – 68, Kolasib – 1142, Serchhip – 4, Khawzawl – 12, Saitual – 1523) an awm tawh a ni.

Suplly department lamin rasltlan te tan hian buhdffai quintal 800 chuang an pe chuuak tawh tih tarlana ni a, District tina thuneitu te pawhin ruahmanna mumal tak neiin hma an la mek tih tarlan a ni bawk.

Vawiin meetingah hian reiloteah Manipurah internet tihnun leh a nih hmel tawh a, hetih lai hian Youtuber te leh social media hmangtu te fimkhur se an duh thu leh thubelhchian dawl lo, boruak ti muang zawng nil ova, ti chhe zual thei chi thehdarh lo turin an duh thu tarlan a ni bawk.