1438/2024-2025

Aizawl, the 5th August, 2024: State pum huapa Mizoram Police-te hriselna leh physical fitness intuaitharna bultan nan tukin dar 7:00 khan Home Minister Pu K. Sapdanga hovin 1st Battalion MAP Playground, Armed Veng, Aizawlah 'Train to Excel' tih thupui hmangin fitness parade, '45 Minutes for All Ranks of Mizoram Police' khuhhawnna neih a ni a; hemi rual hian Mizoram District hrang hrangah SP leh Battalion Commandant-te kaihhruaiin a khuhhawnna hun hman a ni bawk.

Khuallian Pu K.Sapdanga chuan 45 Minutes for all ranks of Mizoram Police khuhhawnna puala kalkhawm Police rank hrang hrangte leh District hrang hranga programme hmangtute chibai bukin duhsakna a hlan a. Mizoram puma Police-te tana taksa sawizawi leh hrilselna lam hawi hmalakna 'fitness parade' bultan a ni chu hmasawnna tura intuaitharna mellung chhinchhiah reng tur a nih ngei a beisei thu a sawi a. Mizoram Police-te chu UT hunlai atang tawha hun rei tak chhung India ram Police-te zinga rinkai langsar leh hmingtha an lo nih tawh thin thu leh mipuite rinngam ni leh tura bultanna fitness parade, 'Train to Excel' thupui hmanga buatsaih chuan rahtha a chhuah ngei a beisei thu a sawi a. Rinngama hnathawk turin fitness tihpun a ngaih thu sawiin, kumin August ni 3 thlengin Police thi 77 chhinchhiah niin kum 50 hnuailam an ni tlangpui a, insun chhan ruihhlo leh a kaihhnawih natna do beihpui thlak a tul hle a ni, a ti a. Police-te chu Dan kengkawha mipui venghim tur an nih thu sawiin, rintlak ni turin khauh zawka kal a ngai a, hei hi ram leh mimal tana tha zawk tur a ni, a ti a. Police-te chu taksa sawizawi bakah ei tur hrisel ei tam tur leh ruihhlo laka fihlim tum tura fuihin, Armed Branch lam bik tan Battalion tinte chu parade leh physical training regular taka neih chhunzawm tum turin a chah a, enzui a nih tur thu a sawi bawk.

Home Minister Pu K.Sapdanga chuan kumin Favangah Police Sports buatsaih a nih tur thu leh tunhmain Police-te chu infiamna lama hmahruaitu an nih thin thu tarlangin, MPL season hnuhnung bera champion Mizoram Police Team-te chhuanawm tiin, season kal mek atan duhsakna a hlan a. Infiammite'n fitness an neih that thu sawiin, Police lak runpuiah infiammite'n mit an lak leh ngei a rin thu a sawi a. Unit tina Sports Cell din ngaihven a that bakah Arm Drill leh Firing lamte uar thar a tul thu a sawi a. International leh Inter-state ramri depa awm kan nih avangin venhimna kalpui uluk a pawimawh thu sawiin, Police-te chu hmanraw hrang hrangte hmang thiam tura chahin Armed Battalion 8 te chu commando standard nei thei tura tanlak a tul thu a sawi a. Uniform chu taksa peng pakhat, zahawmna kengtu a nih angin mipui laka inlulin nana hmang lova hawihhawm taka duty hlen chhuah nana hmang turin a fuih a. Thil tisualtuin dan hnuaia hremna a hmuh theih nan hnuchhui kawngah fimkhur taka hmalak a tul thu sawiin, supervising officer-te chu case investigating officer-te hnaih taka vil reng turin a chah a. Criminal intelligence sang zelah hnuchhui nan cyber investigation system hman a ngaih avangin cyber crime unit tam leh lian zawk din a ngaih dawn thu a sawi a. Police-te chu dote hneh theih nan Criminal Law thar siamte bel taka hre turin a fuih a, Police indaihloh chhante uluk taka chhuia a tul anga hmalak tum a nih thu a sawi bawk.

Pu K. Sapdanga chuan Police-te chu mipui him nana darkar 24 chhung hnathawk thin an nih thu leh mamawh huna che chhuak vat thei tura inring reng turin a fuih a. Out post leh beat post din tura dilna lut engemawzat a awm thu tarlangin, hengte hi sum dinhmun a that hunah ngaihtuah tum a ni, a ti a. Ram pawn atanga dan lova ruihhlo tawlh tam tham tak veivak leh man chhuah tur a awm reng thin chu veiawm tiin, hemi kawngah hian tanlak thar a tul thu leh beihpui thlaka a chhan tak chhuizuia zirchian a tul thu a sawi a. Mizoram Police-in Women Police a neih tlem thu leh mamawh belh a nih thu tarlangin, unarmed unit mai bakah armed unit lamah pawh mizo hmeichhia ralthuam famkima inthuam Sawrkarin hmuh a duh thu sawiin mizo nulate lo inring turin a sawm a. Hun hman chu hmasawn nana intuaithar bultanna a nih thu sawiin, Police hotute chu mipuite rinngam Police neih let leh theih nana hmahruaitu nih tum turin a ngen nghal bawk.

Pu Anil Shukla IPS, DGP Mizoram chuan kalkhawmte lawmna thu sawiin, 45 Minutes for all ranks of Mizoram Police programme chu Home Minister-in a ngaihpawimawh em em Police-te hriselna tura hmalakna pawimawh tak a nih thu a sawi a. Tunhnai kum 5 kalta chhungin chawhrualin kumtin Police 126 te'n chhan hrang hrang avanga nunna an chan thu tarlangin, thihna tam zawkte thlentu laka fihlim thei tura tanlak a ngai hle a ni, a ti a. Nitin minute 45 zel taksa insawizawi nana kan hman phawt chuan taksa leh rilru hrisel kan nei thei dawn a, duty pawh tha takin kan hlen chhuak thei dawn a ni tiin, he programme hmang hian Mizoram Police hrisel, chak leh rintlak kan siam theih ka beisei a ti bawk.

He hunah hian Pu Lalbiakthanga Khiangte IPS, IGP (L&O) chuan lawmthu a sawi a. Hemi hnu hian PT Master kaihhruaiin Physical Training Exercise neih chhunzawm a ni a. He hunah hian Senior Police Officer-te leh an hnuaia Police rank hrang hrang, an vaiin mi 500 vel an tel thei a ni.