140/2025-2026

Aizawl dated 11th April 2025: Vawiin khan Pu K.Sapdanga, Minister, Home Department chuan Directorate of Prisons Conference Hall, Aizawlah Central jail leh District Jail Superintendent-te nen Department hmalakna thlirletna hun a hmanpui a. Pu Vanlalmawia, Secretary, Home Department chuan hun kaihruaiin Prisons Department hnuai a hmalakna tur leh hmachhawp hrang hrang sawi hona hun neih a ni.

Home Minister Pu K.Sapdanga chuan Jail chu misual, awm tha duh lo hremna hmun a kan ngaih thin kha tun ah chuan insiamtha tura inkaihhruaina leh eizawnna tlak thiamthil inzirtirna hmun pawimawh tak a siam nih chhoh mek thu sawiin khawtlang ralmuang leh nuam siam tur hian Jail enkawltute inpekna ah thui tak a innghah thu a sawi a. Prisons Department-a thawktute hnathawh hrang hrangte chu langsar viau lo mahse an mi enkawlte nun ah danglamna nasa tak thlen theitu an ni tih hre reng turin thawktute a chah a. Jail chu nunkawng dik leh tha inzirtirna hmun pawimawh tak a nih angina jail tangte thunun tur chuan a enkawltuten mahni invawn leh inthununtheihna an neih hmasak a tul thu a sawi. 

Pu Vanlalmawia, Secretary, Home Department chuan kalkhawmte lawmna thu sawiin Prisons Department-a thawktute chu dan bawhchhiate hremna tipuitling tur a Criminal Justice System-a thawktu pawimawh tak an nih thu hrechiang tur a chahin khawtlang siamthat nana mawhphurna pawimawh tak neitu an nih thu a sawi. 

Vawiin Directorate of Prisons hnuai a hmalakna hrang hrang thlirletna hun ah hian Pu R.Vanlalsawta, Inspector General of Prisons chuan Power Point Presentation hmangin Prisons Department dinhmun leh hmachhawpte tarlanna hun a hmang a. Pu R.Lalremsanga, Joint Secretary (NP), Home Department chuan lawmthu sawina hun a hmang bawk a ni.

He hun a tarlan danin vawiin thleng hian Prisons Department-a Inspector General of Prisons post chu mi 20-in an chelh tawh a, IGP hnuai ah hian DIG Prisons, AIG Prisons leh Superintendent-te awmin Central Jail-ah Special Superintendent leh District Jail-ah Jail Superintendent-te an awm bawk a ni. September ni 15, 1986 khan Central Jail, Aizawl hi kalpui tan niin tun ah Central Women’s Jail leh District Jail, Aizawl bakah Lunglei, Siaha, Champhai, Kolasib, Lawngtlai, Serchhip leh Mamit District Jail-te awmin Saitual, Khawzawl, Hnahthial District bak ah Vairengte leh Tlabungah Sub-Jail kalpui tur a hmalak mek a ni.

Presentation-a tarlan danin Prisons Department-ah hian Sanctioned Post 443-a awm a, chung zinga Post 327 chu hnawhkhah a ni a, heng zinga 63 chu Provisional Employee niin Contract 2 an awm bawk. Mizoram district hrang hranga Department of Prisons enkawl Jail-te hi Jail tang mi 1386 awm theihna tur a nih laiin tun dinhmunah mi 1703 an awm mek thu tarlan a ni a. Awm tur bituk zat aia tam mi 549 awmin bituk zat aia tam awmna Jail-te chu Central Jail, Aizawl, Central Women’s Jail, Aizawl, Aizawl District Jail, Lunglei District Jail leh Champhai District Jail-te a ni a. Central Jail leh District Jail thawmthatna tur ruahmanna engemaw zah peihfel tawh a nih thu tarlan a ni. Jail tangte hun tangkai zawk a hman a nih theih nan an thiamna tihpunna tur ‘Skill Development Training’ buatsaih thin a ni a. Ar leh Vawk vulh, Carpentry Workshop, Computer Training, Agriculture farming, Weaving/Handloom/Tailoring leh Handicraft training kalpui thin a nih thu tarlan a ni.