Vawiin chawhnu khan Home Minister Pu Lalchamliana chuan 112 Emergency Response Centre, Aizawl SP Office-ah hawngin, Emergency Response Support System (ERSS) Vehicles a vai liam bawk a ni. 112 Emergency Response Centre hawnna hun hi Pu LH Shanliana, IPS, IGP chuan a kaihruai a ni.

Home Minister Pu Lalchamliana chuan Emergency Response Centre hawn theia a lo awm hi lawmawm a ti a, chhan hrang hrang avanga rikrum thil lo thleng thin atana lo inringlawkna tha hi hun rei tawh tak atanga chona lo awm a ni, a ti a. Rang taka beisei anga hma rawn la tu C-DAC hnenah pawh lawmthu a sawi a. Minister Pu Lalchamliana chuan nitin nunah mitinin rikrum thil thalo tawng thei vek kan ni a, ERSS hawnna atan hian sawrkar laipui chuan Rs 438 lakhs Mizoram sawrkar pe in, Rs 48 lakhs vel chu la hmanloh a la awm a ni, a ti a. ERSS hi India ramah ahmasa ber a tan Himachal Pradesh ah hman hmasak ber a ni a, tun dinhmunah hian State leh UT 16 ah hman a ni tawh a ni, tiin a sawi a. Emergency thil re re ah India ram pumah Number 112 hi hman tawh tur a ni a, Mobile Phone  emaw, panic button emaw, sms, mobile app 112 India atangin Emergency Response Centre hi call theih reng a ni, a ti a. Mizoram-ah Pilot Project atan District Pali Aizawl, Champhai, Kolasib leh Lunglei ah te Response Team te dah  a ni, tiin a sawi a ni.

ERRS in a tum pawimawh tak chu engemaw avanga chhiatna rikrum thil a lo thlenin, awlsam zawka tanpuina dil leh chhanchhuahna hna leh a tul dangte thawh vat theihna tur a ni. Mipui ten 112 ERRS hi a tulah chiah hman tur a ni a, fiamthu thawh nan leh inbum nana hmanglo turin Home Minister Pu Lalchamliana chuan mipuite a chah bawk a ni.

112 ERRS hi chhiatna hrang hrang kangmei, medical lamah leh accident hrang hrang a lo thlena engtik lai pawha call theih a ni a. Police, Fire leh Ambulance motor te hemi atan hian inring rengin an awm a ni. Emergency Response Centre enkawl tur hian Police 16 train an ni a, hemi te bakah hian C-DAC chuan kum thum chhung a vil pui bawk dawn a ni. 112 ERRS hi Home Ministry leh Ministry of Women & Child Development bultum a ni.

He hunah hian SBK Singh, IPS, DGP (M), Lalbiakthanga Khiangte, State Nodal Officer, ERSS leh midangte an tel a ni.