1st Bn. MAP Hqrs., Armed Veng hmuna Magazine Guard Room/Armoury thar sak chu vawiin khan Home Minister Pu R. Lalzirliana’n a hawng a. Mizoram DGP Pu Lalrokhuma Pachuau leh Mizoram Police hotute bakah Mizoram Police Pensioners te leh Armed Veng-a tlawmngai pawl hruaitu hrang hrang te pawh Armoury hawnna hunah hian an tel ve a ni.

Khuallian Home Minister Pu R. Lalzirliana chuan sorkar laipuiin police modernisation atana sum a pek atanga Mizoram Police te hmasawnna tur hrang hrang thawh a ni mek a, vawiina 1st Bn. MAP Magazine Guard Room thar tha tak hawn a ni thei chu a lawmawm takzet a ni, a ti. State Budget atanga tih harsa mahse police modernisation fund atanga thawh theih theih chu thawk zelin, mipuite hmuh leh hriat theih khawpin Mizoram Police Department chu tih hmasawn mek a ni, a ti. Home Department Police hotute leh hnathawk zawng zawngte chu an invawnna (discipline)-ah an entawntlak hle a ni tiin Pu R. Lalzirliana chuan sorkar pawhin police department tih changtlun chu ngai pawimawhin ralthuam leh mamawh dang chi hrang hrang pek belh a, thuamthat hna chu chak takin a thawk mek a ni, a ti. 3rd IR Bn. hmunpui tur chu Thingkah, Lawngtlai-ah leh 4th IR Bn. hmunpui tur Rengdil-ah sorkar laipui tanpuinain sak tum a nih thu leh a hmun enfiah turin TCIL Company te an rawn thawk chhuak thuai tur thu a sawi bawk. Home Minister chuan eng hna pawh thawk ila dikna a pawimawh ber a, dik taka thawh chuan a tawpah chawimawina, hmingthatna leh lawmman duhawm an chang ngei ngei thin tiin police leh mipui kalkhawm te a fuih a ni.

Vawiina Khual Zahawm Mizoram DGP Pu Lalrokhuma Pachuau pawhin thu sawiin sorkar duhsakna leh hmalakna chak tak avangin Mizoram Police-in silai, mu leh grenade te him taka dahthatna tur armoury thar a nei thei ta chu a lawmawm hle a ni, a ti a. Mamit leh Kolasib District-ah SP Office thar tur te, Khawzawl-a Commandant Office te, Lunglei leh Serchhip District SP Office cheithat te leh hmun hrang hranga police station te pawh tih changtlun an nih mek thu a tarlang a. State dang police te aia Mizoram Police te hnufual phal lovin sorkarin theihtawp chhuahin thuamthat hna a thawk zel a, tunah hian US Colt Comapany siam silai tha pawh lei theih tura hmalak mek a nih thu a sawi bawk. Tun hnaia Mizoram Police te hmasawnna hrang hrang tarlangin DGP chuan Commando Team 2 din tawh a nih thu te, bullet-proof vehicle 2 neih a nih tawh thu te, troop carrier chah mek a nih thu leh VVIP Bullet-proof car Mitsubishi Company kutchhuak te pawh neih a nih tawh thu a tarlang a. Forensic Laboratory nasa taka tihchangtlun a nih tawh thu leh SP (Security) Office, Khatla pawh cheithat a nih thu a sawi bawk a ni.

Vawiina hawn tak Armoury thar hi 16.5.2011 atanga sak tan niin ni 22.11.2011-ah sak zawhfel a ni a. He Magazine Guard Room leh a kawt vel sakna tur hi Modernisation of Police Force Scheme 2010-2011 atanga hmuh a ni a, hei hi Central Sorkara Ministry of Home Affairs atanga hmuh niin a vaiin Rs.23.50 lakhs hman a ni. 1st Bn. MAP Magazine Guard Room hlui kha kum 1954-a sak niin kum 57 zet luah anih hnuin tunah hian Magazine Guard Room thar sak a lo ni ta a. Hemi ang chiah hi tunah 2nd Bn. MAP Lunglei-ah sak mek a ni bawk.