Pu R. Lalzirliana Home Minister chuan ni 13.4.2010 tlai dar 3:15 ah Lunglei lo thlengin amah hmuahna Circuit House ah Pi M. Zohmingthangi, IAS, Lunglei Bawrhsap hovin official ten Police Quard of Honour nen lo hmuah a ni. Zan riakin Pu Zira hian 14.4.2010 chawhnu dar 1:00 ah D.C. Office chamber ah Naupang huaisen Joseph Vanlalhruaia s/o K. Pazawna, Farm Veng, Lunglei hnenah Jeevan Raksha Padak Award hlanna a nei a, he programme hi Bawrhsap in a kaihruai a ni.
Chumi hnu chawhnu dar 2:00 ah R.D. Complex a HPC Vice Chairman Office hmun tur Chanmari ah enna a nei a, BDO Office a tlawh nghal bawk. Hemi hnu hian Farm veng  ah kalin Community Hall sak mek leh Mini Sport complex hmun tur enna a nei a; hall sak zawhna tur pawh sawrkar in a ngaihtuahsak tur thu leh Mini Sport Complex pawh ngaihtuah zel a nih tur thu a sawi. Minister hi Pu Joseph Lalhlimpuia, Vice Chairman HPC leh official ten an tawiawm a ni.

Hemi hnu hian Lunglei Police tlawhna a nei a ; Conference Hall an buatsaih thar hawnna a nei nghal bawk. Chumi hnuah Police Patrol Vehicle tlannchhuak tur a vailiam nghal bawk. Hemi hnu ah Art & Culture Hall-ah MAP, MRP leh Force hoten Samilan an neih ah thusawina a nei nghal a ni. Thusawiin Minister chuan Mizoram Police te chu Police tha ber ni tura inbuatsaih turin a fuih. Police te chu Ram leh Hnam venghim thei turin rinawmna leh discipline kengkawh tlata tihtur tul apiang ti thei tura inring reng turin a fuih. He Police Samilan hi Pu Lalliamnawia, SP Lunglei in a kaihruai a ni. Pu Hrangnawna, DIG (N) Range chuan Police te chu chhungkua khat kan ni a, Police Welfare ngaipawimawh a, ram leh hnam tan rinawm leh taima tak a thawk turin a chah a ni.

Pu Lalzirliana chuan ni 12.4.2010 tlai dar 4:00 khan S.P. Office a tlawh a, harsatna hrang hrang an tawh te a hmun ngei ah a hmanpui ani.